Tanba ne’e, Ministru Justisa Manuel Cárceres,  hatete, atu lori fila Emília Pires mai Timor ne’e desizaun husi Tribunál no Ministériu Públiku nian.

“Ha’u hanesan ministru  justisa haree ba polítiku de’it, justisa forma ne’e Prokuradór Jerál  Repúblika nian no Tribunál mak trata asuntu ne’e,”dehan ministru iha nia kna’ar fatin Ministériu Justisa, Kolmera -Dili, horisehik.

Iha fatin ketak, Diretór  Ezekutivu JSMP Luis Oliveira de Sampaio, hatete kazu seidauk  iha desizaun  finál husi tribunál Rekursu governu la bele intervein ka tau sira nia liman iha laran.

Desizaun ne’e, nia dehan, seidauk iha desizaun husi TR tanba kazu Emília Pires ne’e sei tama tránzitu injulgadu.

 “Kuandu ita nia Tribunál Rekursu hatún ona desizaun ruma mak ita nia politika sira hafoin buka meus,’’ dehan nia.

Maibé, nia dehan, prosesu ba kazu eis Ministra Emília Pires ne’e sei la’o hela governu labele halo buat ida.

Bainhira TR hatún desizaun hodi kondena, nia dehan, foin parte governu halo aprosimasaun ho diplomátiku liu husi Ministru Justisa no Ministru Negósiu Estranjeiru no Kooperasaun inklui Ministériu Públika ho governu Portugál atu lori Emília fila mai TL.

Nia dehan, kazu ne’e iha área tribunál ninian, prosesu ne’e seidauk iha desizaun di’ak liu hein de'it bainhira desizaun sai mak hafoin husu governu nia intervensaun.