Governu Japaun Apoia Tan Ambulansia Haat ba MS Featured

By Ivonia Varela Jullu 06, 2023 497
Kareta Ambulansia haat ne’ebé Governu Japaun Apoia ba Ministeriu Saúde, para hela iha Edifisiu Palasiu das Cinzas, Kaikoli, Dili, kinta (06/07/23). Foto:INDEPENDENTE/Julião. Kareta Ambulansia haat ne’ebé Governu Japaun Apoia ba Ministeriu Saúde, para hela iha Edifisiu Palasiu das Cinzas, Kaikoli, Dili, kinta (06/07/23). Foto:INDEPENDENTE/Julião.

DILI: Governu Japaun liu-husi Ministeriu Estadu Negosiu Estranjeiru Japaun nian apoia tan kareta ambulansia hamutuk unidade haat (4) ba Ministeriu Saude (MS).

Ministra Saude IX Governu Konstituisional Élia dos Reis Amaral hatete, Governu Japaun fó apoiu tan ambulansia unidade haat (4) ba MS, ne’e kontinuasaun de’it tanba iha tempu Covid-19 sira apoiu uluk ona ambulansia hamutuk unidade 38.

“Ohin Governu Japaun apoia tan ambulansia unidade haat mai MS, ne’ebé halo kontinuasaun de’it tanba iha tempu Covid-19 ita simu ona unidade 38 no hamutuk ho ida ohin 42 ambulansia,” dehan Ministra Élia, iha Palansiu das Cinzas, Kaikoli, kinta ne’e (06/07).

Nune’e, Ministra Saúde hato’o obrigadu no agradese wa’in ba Governu Japaun liliu Ministeriu Estadu Negosiu Estranjeiru Japaun ne’ebé mai entrega rasik ambulansia refere.

Iha fatin hanesan, Ministru Estadu Negosiu Estranjeiru Takei Shunsuke senti kontenti ho projetu asistensia saúde ba Timor-Leste, liu husi subvensaun asistensia Japaun nian, ne’ebé remata ona ho intrega kareta ambulansia ne’e.

 “Ha’u kontenti hare dezenvolvimentu iha nasaun ida ne’e, ne’ebé ami nia sorumutu ho sua exelensia Primeiro Ministru no MNEK ne’ebé foin simu pose iha loron dahuluk fulan ne’e, diskuti kona-ba dezenvolvimentu ba nasaun ida ne’e,” dehan nia.

Nia dehan, Ko’alia kona-ba importansia husi dezenvolvimentu rekursu umanu Timor-Leste, iha Japaun hatete katak saúde mak rikusoin ba dezenvolvimentu rekursu umanu.

Tanba ne’e, importante tebes atu mantein saúde, tanba saude mak pre-rekezitus ida ba dezenvolvimentu rekursu umanu.

“Ba intensaun ida ne’e esensial atu hadi’a prestasaun servisu sosiais inklui asistensia médika. Ne’e duni ha’u fiar katak Ministeriu Saúde iha Timor-Leste hala’o papel ida ne’ebé krusial tebes,” nia hato’o.

Rate this item
(0 votes)

Independente Digital TV