Governu-Igreja Katólika kuda ai-oan 25 iha katedrál Dili Featured

By Ivonia Varela Abril 19, 2024 401
 Sekretariu Estadu Floresta (SEF), Fernandino Vieira da Costa hamutuk ho Arcebispo Metroplitana Dili Dom Virgilio Cardeal do Carmo da Silva kuda ai oan iha areador Igreja Katedral nian, (19/04/24). Foto:INDEPENDENTE. Sekretariu Estadu Floresta (SEF), Fernandino Vieira da Costa hamutuk ho Arcebispo Metroplitana Dili Dom Virgilio Cardeal do Carmo da Silva kuda ai oan iha areador Igreja Katedral nian, (19/04/24). Foto:INDEPENDENTE.

DILI: Ministeriu Agrikultura Pekuaria Peskas no Floresta (MAPPF) liuhusi Sekretária Estadu Floresta (SEF) hamutuk ho Autoriedade Munisípiu Díli no Igreja Katólika kuda ai-oan hamutuk 25 iha areadores Katedrál Dili.

Sekretariu Estadu Floresta (SEF), Fernandino Vieira da Costa hatete, kuda ai-kameli iha katedrál, oinsá atu bele konserva no proteje ai-kameli sai hanesan identidade Nasaun Timor-Leste nian.
“Durante periodu sekulu lubuk ida mak ita liu, ai-kameli la’os de’it ba identidade nasaun nian maibé sai mos hanesan ita-nia rekursus florestas ne’ebé mak iha oinsá para dezenvolve sai hanesan ekonomia ba nasaun nian,” dehan SEF iha Katedrál, Sesta (19/07).
Nia dehan, karik aban bai-rua mina no gás maran TL sei iha rekursu ne’ebé iha potensiál iha hodi bele subtitui fali.
Iha fatin hanesan, Prezidente Autoriedade Munisipiu Dili, Grigório Saldanha hatete, hamutuk hodi haburas nafatin Díli, tanba iha ona Moto “DILI HAMURAK” katak Dili hakmatek, fatin violénsia fatin rungu-ranga nia tenki mós tanba Bainhira Díli mos no furak ema hotu nian.
“oin ita hare hahú kuda iha katedrál nia oin hanesan fatin ita fé ninian haburas no dezenvolve tuir nafatin ba igreja sira, iha uma oin mos bele kuda ai, ai-funan, modo atu nune’e la iha fatin mamuk ita haree, no ita haree tenke iha buat ruma moris iha ne’eba,” dehan PAM.
Prezidente dehan, iha programa tuir mai sei hare hotu edifísiu públiku sira ne’ebé identifika hodi sai prioridade hodi kuda uluk hafoin tuir tan seluk, tanba iha ona polítika ida katak labele husik fatin mamuk tenki kuda ai hotu.
Iha biban ne’e, Arcebispo Metroplitana Dili Dom Virgilio Cardeal do Carmo da Silva hato’o Agradese ba governu tanba bele hili fatin katedral tanba hili ona fatin katedral hodi kuda ai-kameli.
“Katedral hanesan ita hotu hatene hanesan uma boot sarani ninia hodi hahu iha ne’e hamatak liu tan katedral hodi kuda ai-kameli hale’u katedral ida ne’e hodi Arquidiosese nia naran hato’o agradese ba iha ita boot sira nia esforsu, tanba katedral sentru laos ema mai atu hare deit igreja nia murak maibé bele hare jardin,” dehan Cardeal.
Ai-oan 25 ne’ebé kuda iha areadores Katedral Dili kompostu husi ai-kameli 23 no ai-kasi rua (2).

Rate this item
(0 votes)

Independente Digital TV