Programa BdM-JF etapa daruak sei realiza iha Munisípiu Likisa, Kovalima, Manatuto no Vikeke.
Vise-Ministra Solidariedade Sosiál no Inkluzaun, Chandrawati Signi Verdial hatete, Oitavu Governu Konstitusionál iha prioridades tolu (3) mak hanesan, primeiru ema, segundu ema no terseiru ema, hodi enfatiza katak dezenvolvimentu umanu mak dalan ida di’ak liu atu transforma Timor-Leste husi ohin no ba futuru ida ne’ebé di’ak liu.
Governu kria programa ida ne’e ho objetivu ida atu hamenus ki’ak, hadi’ak saúde no nutrisaun, redús ra’es badak no haburas ekonomia ba hotu-hotu.
Governu nia interese mak gradualmente transforma Timor-Leste sai país ida forte, instruida no saudável liu husi dezenvolvimentu ida ne’ebé buka atu hadi’ak índise dezenvolvimentu umanu.
“Liu husi lansamentu ofisiál rejistu dijitál ida ne’e, mai ita hotu ne’ebé prezente renova ita nia kompromisu hodi Investe iha ita nia oan sira, investe iha futuru,”Online INDEPENDENTE sita iha komunikadu, tersa (28/02).
Tuir Governante ne’e, labarik sira mak futuru Timor-Leste nian no dalan ida di’ak liu atu investe mak labarik sira.
Tan ne’e Vise Ministra hato'o agradese ba parseiru dezenvolvimentu Governu Australia ne’ebé tulun ona Governu Timor-Leste ba investimentu rekursus umanu, liu husi programa BdM-JF.
Iha fatin hanesan, Diretór Jerál Administrasaun no Finansas, Rui Manuel Gago Exposto hateten, programa ne’e ho karakter universál no la distinge ba ema, maibé la’ós obrigatóriu.
BdM-JF mak programa transferénsia osan husi sistema asisténsia sosiál ne’ebé kompostu ba subsídiu dolar amerikanu $15.00 kada fulan ba inan isin-rua sira durante períodu kous no $20.00 kada fulan ba labarik tinan zero to’o tinan tolu (0-3) no sei kontinua to’o labarik tinan neen (6), ho suplementu adisionál $10.00 kada fulan bainhira labarik ho moras króniku no/ka defisiénsia.
Aleinde subsídiu osan kada fulan, programa BdM-JF mós fornese akonsellamentu kona-ba saúde husi pesoál saúde sira inklui ba kuidadu saúde durante períodu isin-rua, periódu primeira infánsia inklui imunizasaun, nesesidade hahán nutritivu ba família no prátika ijéniku no sanitazasaun.
Nia dehan, pagamentu refere sei liu husi Fintech-Mosan Telemor.
"Vikeke sai prioridade ba 2023, tanba ita haree dadus estatistika 2015 nian hatudu katak, Vikeke sai hanesan munisípiu ida ne’ebé númeru pobreza, mal nutrisaun no ra’es badak aas," tenik nia.
Entretantu, molok ne’e, iha tinan 2022, Governu liu husi MSSI implementa ona programa BdM-JF ba munisípiu tolu (3) hanesan, Ainaro, Bobonaro no RAEOA ho ninia estimasaun dadus hamutuk rihun 27.
“Maibé hahú iha Jullu 2022, ita konsege rejista rihun 15 resin husi rihun 27, signifika katak progressu ba benefisiáriu sira ne’ebé iha, por volta 55%.
Enkuantu, Diretór Saúde Munisípiu Vikeke, Pedro da Silva ne’ebé representa Ministra Saúde hateten, Ministériu Saúde mesak sei labele rezolve problema mal nutrisaun no ra’es badak, maibé ho servisu hamutuk entre MSSI, Autoridades Lokais no entidades hotu mak bele redús númeru mal nutrisaun no ra’es badak iha Timor-Leste.
