Desizaun ne'e Governu foti hafoin halo analiza klean ba apresentasaun husi Sala Situasaun Sentru Integradu Jestaun Krize (SIJK) kona ba ponto situasaun epidemiologika iha país.

“Ohin Konsellu Ministru desidi atu la extende tan serka sanitaria iha Munisipiu sira hanesan, Munisipiu Baukau, Kovalima no Ermera, ne'ebé sira nia serka evijensia hotu hahú iha tuku 23.59 loron 22 fulan-Setembru tinan 2021,”dehan Ministru Prezidensial Konsellu Ministru Fidelis Leite Magalhães, iha Palasiu Governu, kuarta ne’e (22/9).

Enkuantu, serka sanitaria iha Munisipiu Dili extende ba loron hitu tan, hahú iha oras 00.00 loron 22 to’o oras 23.59, loron 29 fulan-Setembru tinan ne’e.

Nune’e, mantein impozisaun proibisaun sirkulasaun ema sira-nian entre munisipiu Dili no sirkunskrisaun administrativa sira-seluk, exetu iha kazu hirak ne’ebé iha fundamentu forte tanba razaun seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku nian.

Tanba ne’e, lainklui iha proibisaun ba sirkulasaun individuu sira ne’ebé komprova vasinasaun kompleta (doze rua) kontra Covid-19 no mós ba labarik sira ho idade tinan 6 mai kraik ne’ebé akompaña individu refere.

Maske nune’e, ba Munisipiu sira ne’ebé la aplika ona serka sanitaria, maibé Governu husu nafatin ba sidadaun sira hotu atu iha responsabilidade ba ida-idak nia saúde no familia nia saúde atu kontinua pratika ho rigor uza maskara, fase liman no distansiamentu.

Aleinde, ba instituisaun sira hanesan, igreja, loja, motorista, ba eventu familia sira nian, atu kumpri nafatin protokolu saúde ne’ebé adopta iha Timor-Leste.

Asistente Editor: Saturnina da Costa