Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araujo informa, Munisipiu Dili kontinua rejista númeru kazu boot liu kompara ho Munisipiu sira seluk.
Husi total kazu detetadu 67, iha Dili deteta kazu 42, Baukau kazu 10, RAEOA kazu 8, Manatuto kazu 4, Manufahi kazu 1 no Vikeke kazu 2.
“Husi kazu detetadu ne’e, na’in20 ka 80% hatudu sintomas, na’in 13 ka 19% simu ona vasina kompletu no na’in 9 ka 13% simu ona vasina doze dahuluk,”dehan nia iha komunikadu ne’ebé Online INDEPENDENTE asesu tersa ne’e.
Maske deteta kazu pozitivu, maibé SIJK mós rejista kazu rekuperadu ne’ebé barak liu kazu pozitivu foun. Iha 21 Setembru ema na’in 318 mak rekupera no kazu ativu iha na’in 1.319.
Ba kazu mate, Rui informa, sidadaun na’in rua ne’e seidauk simu vasina.
Kazu dahuluk, mane ho idade tinan 84, seidauk simu vasina, diagnostikadu Sindroma Insufisiensia Respiratoria Aguda (SIRA) tanba Covid-19 iha Hospital Nasionál Guido Valadares iha 16 Setembru. Pasiente ne’e iis kotu iha izolamentu Vera Crus, horseik (20/09) kalan tuku 22.20.
“Familia kolabora ho ekipa saúde atu hala’o funeral tuir protokolu ne’ebé adota iha Timor-Leste,” dehan Rui.
Kazu daruak, feto ho idade tinan 68, seidauk vasina, diagnostikadu ho SIRA iha HNGV tanba Covid-19, iha 12 Setembru 2021. Pasiente ne’e sofre mós moras diabetes no ipertensaun, nune’e ohin dader tuku 11.57 hakotu-iis.
Entretantu, husi horseik (20/09) mai ohin teste PCR ne’ebé Laboratoriu Nasional Saúde halo iha Dili hamutuk na’in 372 kompostu husi Vijilansia sentinela na’in 6, Contact tracing na’in 20, Random screening na’in 47, Viajen sai husi serka sanitaria Dili na’in 125, Viajen internasional na’in 43 no Follow up iha kuarentena na’in 121.
Teste PCR ne’ebé halo iha Munisipiu sira seluk, RAEOA no HNGV hamutuk na’in 480. Ohin iha Izolamentu Vera Crus, Lahane, HNGV no fatin seluk iha teritoriu laran tomak halo tratamentu hospitalizadu ba kazu detetadu hamutuk na’in 58 kompostu husi kazu grave na’in 10, moderadu na’in 35 no kazu leve na’in 13.
