Antes halo abertura ofisiál ba sistema GRP, Ministru Finansas Rui Gomes mós simbolicamente Entrega Pakote OJE 2023 ba representantes Gabinete da Presidência da República, Gabinete do Presidente do Parlamento Nacional, Gabinete do Primeiro-Ministro, Gabinete Presidente do Tribunal de Recursos nomós ba Liñas Ministeriais.
Sesaun Traballu ne’e realiza iha Auditóriu Ministériu Finansas no organiza husi Diresaun Jerál Planeamentu no Orsamentu, Ministériu Finansas.
“Ita foin husik tinan 2022, tinan ida ke nakonu ho traballu intenso. Susesu lubun ida ke Ita alkansa ona, estraordináriu tebes, ne’e hatudu rezultadu husi Reforma Fiskál no Jestaun Finanseira Públikas,”dehan komunikadu ne’ebé Online ne’e sita, segunda (09/01).
Hahú ho promulgasaun Lei Enkuadramentu Orsamentál husi Prezidente da República sesante tuir kedan ho promulgasaun Lei das Grandes Opções do Plano ba 2023 husi atuál Prezidente da República, José Ramos-Horta. Ho promulgasaun Leis estruturantes ne’e, hamutuk ho Diploma sira ke regulamenta hodi fasilita ezekusaun orsamentál 2023 hanesan Decreto Governo kona-ba Programas Orçamentais no Decreto Governo kona-ba Classificadores Orçamentais, hatudu katak Presidentes da República komprende importansia husi Reforma Fiskál no Jestaun Finanseira Públikas.
Ministru Rui Gomes mós hateten konkista importante ida ne’ebé mak Governu alkansa iha tinan 2022 mak ezekusaun reál OJE 2022 em termos nominais atinji $1,743 bilhões, valór ida ne’ebé pela primeira vez aas liu iha istória Timor-Leste desde país ida-neé restaura nia Independénsia no konsege ultrapassa ezekusaun reál OJE 2016 iha ne’ebé Governu konsege ezekuta $1,630 bilhões.
Ho ezekusaun reál OJE 2022 ne’ebé fenomenal sa’e 7% kompara ho ezekusaun reál OJE 2016 hatudu katak kapasidade ezekusaun orsamentál iha liñas ministeriais mós aumenta. Atu mantein ritmu no kapasidade ezekusaun ida-ne’e presiza investimentu kontínuu iha área rekursus umanu, iha sistemas inklui iha enkuadramentu legal sira.
Sesaun Traballu ne’e hetan partisipasaun husi Diretór Ezekutivu Ajensia Nasionál Planeamentu, Monitorizasaun no Avaliasaun (ANAPMA), Ageu Jorge Cardoso, Representantes Gabinete da Presidência da República, Gabinete do Presidente do Parlamento Nacional, Gabinete do Primeiro-Ministro, Gabinete Presidente do Tribunal de Recursos, Diretores-Gerais, Responsaveis Órgão e Serviços Fundo Autónoma, Diretores-Nacionais inklui Assesores no Tékniku Administrasaun no Finansas Públikas.
