Ministru Prezidensia Konsellu Ministru, Fidelis Leite Magalhães hatete, Governu foti desizaun ne’e, hafoin halo analiza ba aprezentasaun kona ba pontu situasaun epidemolójika husi Sala Situasaun Sentru Integradu Jestaun Krize (SIJK).
“Konsellu Ministru aprova projetu Rezolusaun Governu nian ne’ebé mantein impozisaun serka sanitária iha munisípiu Dili no Ermera to’o tuku 23:59, loron 26 fulan-Agostu,” dehan nia iha Palasiu Governu , kuarta ne’e (11/08).
Nune’e, bandu sirkulasaun ema nian entre Munisipiu Dili no Ermera no mós sirkunskrisaun administrative sira seluk, exetu iha kazu hirak ne’ebé nia fundamentu forte tanba razaun seguransa públika, saúde públika, asistensia úmanitaria, manutensaun sistema abastamentu públiku,
Enkuantu, la inklui iha proibisaun sirkulasaun ida ne’ebé individu sira komprova ona vasinasaun kompleta kontra Covid-19, no mós labarik sira ho idade 6 mai kraik, ne’ebé akompaña individu sira ne’e.
Entretantu, tuir dadus jeral Covid-19 iha Munsipiu Ermera, total komulativu kazu konfirmadu hamutuk 906, komulativu rekuperadu na’in 149 no kazu ativu ne’ebé iha izolamentu hamutuk 759.
Aliende, dadus jeral Covid-19 iha Kapital, total komulativu kazu konfirmadu hamutuk 8.731, komulativu rekuperadu 8.189, komulativu óbitu na’in 22 no kazu ativu iha izolamentu na’in 520.
Asistente Editor: Saturnina da Costa
