Desizaun ne’e foti, hafoin halo analiza ba aprezentasaun kona ba pontu situasaun epidemolójika husi Sala Situasaun Sentru Integradu Jestaun Krize (SIJK).
“Konsellu Ministru tenki foti desizaun hodi impoin konfinamentu domisiliáriu jéral ba postu-rua ne’e, tanba virus dadauk ne’e nakdaet ona iha postu refere,”dehan Ministru Prezidensia Konsellu Ministru, Fidelis Leite Magalhães, iha Palasiu Governu, kuarta ne’e (11/08).
Nune’e, ema hotu tenki hela iha uma ka alojamentu temporáriu inklui sentru akollamentu, exetu iha situasaun ne’ebé prevee ona iha anterior, liu-liu tanba razaun saúde, servisu, asesu ba sasan no servisu nesesidade bazika nian.
Aleinde, ema sira ne’ebé komprova vasinasaun kompleta (doze rua) kontra Covid-19 nian, lainklui iha impozisaun konfinamentu domisiliáriu ne’e.
Entretantu, tuir dadus jeral Covid-19 to’o ohin (11/08), iha Munsipiu Ermera, total komulativu kazu konfirmadu hamutuk 906, komulativu rekuperadu na’in 149 no kazu ativu ne’ebé iha izolamentu hamutuk 759.
Asistente Editor: Saturnina da Costa
