Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, kazu foun ne’ebé deteta ohin, iha Kapital Dili na’in 78, Aileu 5, Baucau 4, Bobonaro 20, Covalima 19, Ermera 4, Vikeke 1 no RAEOA 7.
“Kazu detetadu foun ohin iha mane na’in 74 no feto 64, husi sira ne’e hotu iha na’in 65 ka pursentu 47,1 (47,1%) mak hatudu sintomas,”dehan nia iha komunikadu, tersa ne’e.
Enkuantu, pasiente rekuperadu ohin hamutuk na’in 15 no kazu ativu iha sala izolamentu hamutuk 1.544.
Total komulativu kazu konfirmadu sura husi loron 21 fulan-Marsu tinan 2020 to’o loron 10 fulan-Agostus tinan 2021 hamutuk 11.717.
Entretantu, kazu mate ho Covid-19 ohin iha mane na’in ida ho idade tinan 71, hanesan sidadaun Timoroan, enkamiña husi Ospital Referénsia Eduardo Ximenes (HoREX) Baucau, iha loron 7 fulan-Agostu tinan 2021, ho diagnóstiku SIRA (Sindroma Insufisiénsia Respiratória Aguda), Xoke Séptiku no Pneumonia, tanba Covid-19 (rezultadu PCR, 5/8/2021: CT Egene 36.8, N2 gene 40.3). Iha loron ne’e kedas, ekipa médika espesializada halo tratamentu tuir protokolu ne’ebé iha, no iha loron 9 fulan-Agostu, matebian hakotu iis tanba multiple organ
failure. Ninia rezultadu PCR post mortem (hafoin i’is-kotu) negativu. Familia lori mate-isin ba haloot iha Municipiu Baucau.
Nune’e, Komulativu óbitu iha Timor-Leste total hamutuk na’in 29 kompostu husi mane 18 no feo na’in 11.
Husi horiseik (09/08) mai ohin teste ne'ebé mak Laboratóriu Nasionál Saúde halo hamutuk 388 PCR, ho detallu hanesan, Vijilánsia sentinela na’in 30, Contact tracing 77, Random Screening 10, Viájen sai husi serka sanitária husi Dili 183, Viájen internasionál 62 no Follow up iha kuarentena na’in 26.
Teste PCR ne’ebé halo horiseik (09/09) iha Munisipiu sira seluk, RAEOA & HNGV hamutuk 139 ho detalle hanesan, Baucau 108, Maliana 91, Ermera 9, Maubisse 71, RAEOA 32, Suai 41, Vikeke 9 no HNGV na’in 70.
Totál doze vasina ne’ebé fó ona ba populasaun elijível (tinan 18 ba leten), to’o ohin dadeer 10H00, (10/08) tuir sistema informasaun saúde iha MS ba doze dahuluk hamutuk pursentu 42,7 (42,7%) no doze daruak hamutuk pursentu 15,0(15,0%).
Nune’e, ohin iha izolamentu Vera Cruz halo tratamentu ba kazu detetadu hamutuk na’in 23.
Tanba ne’e, SIJK nafatin informa ba públiku katak rezultadu sekuensiasaun genómica amostra 20 husi kazu pozitivu iha Munisipiu Ermera, ne’ebé Laboratoriu Nasional Saúde haruka iha loron 29 fulan-Jullu tinan 2021 ba Peter’s Doherti Institute iha Melbourne, Australia, ho pedidu atu halo análize urjenti, hetan ona resposta preliminar, iha loron 7 fulan-Agostu 2021, ne’ebé hatudu amostra husi ema nian 12, iha lineajen B.1.617.2 (Delta), variante ne’ebé preokupante, ka ‘’variant of concern’’. Nune’e, ohin, simu tan rezultadu husi amostra 8 seluk, no konfirma prezensa lineajen B.1.617.2 (Delta), iha amostra 8 ne’e hotu. Ida ne’e signifika 100% husi amostra 20 ne’ebé haruka iha loron 29 fulan-Jullu, hatudu prezensa variante Delta. Rezultadu hirak ne’e konfirma liu tan, katak variante preokupante Delta nakda’et ona iha komunidade Ermera nia le’et, liu-liu iha Gleno, Ermera ho Railaco.
Asistente Editor: Saturnina da Costa
