Nune'e, Konsellu Ministru aprova projetu proposta lei ne'ebé aprezenta husi primeiru ministru ho objetivu atu aumenta tan loron vijensia iha artigu 3, ba lei medida exesionál sira tanba ninia loron sei kaduka iha fulan oin.

"Konsellu Ministru husu fali atu haruka ba Parlamentu Nasionál hodi bele hetan fali aprovasaun hodi estende tan loron ba medida exesionál ne'ebé tau iha artigu 3 lei sistema saúde nian no haruka ba Prezidente Repúblika atu hetan promulgasaun," dehan Ministru Prezidensia Konsellu Ministru (MPKM), Fidelis Manuel Leite Magalhães, iha Palásiu Governu, horisehik.

KM aprova projetu proposta lei, ne’ebé aprezenta husi Primeiru-Ministrus, Taur Matan Ruak, halo renovasaun daruak ba medida exesionál no temporaria ba vijilénsia sanitária hodi hataan ba pandemia moras Covid-19 nian, ne’ebé prolonga vijénsia husi artigu da 3 Lei númeru 24/2021 nian, loron 19 fulan Novembru.

Ho alterasaun ne’e, medida exesionál sira ne’e prolonga ba periodu loron 120 tan mai.

"Tanba ne'e mak ohin iha dekretu lei ne'e ohin ita hatuur ho tenke fo nota esplikativa, liuliu iha preambulu proposta ne'ebé governu husu ba Parlamentu tenke hatuur mós dadus sira ikus liu kona-ba situasaun pandemia nian," dehan Fidelis.

Nia afirma, ho loron ne'ebé artigu 3 fó loron 120 ne'e para permite governu hola medida sira bainhira moras Covid-19 ne'e sei iha ka akontese.

"Tanba ne'e mak para ita hodi labele halo tan estadu emerjensia, entaun para governu iha rasik poder ka iha rasik kompetensia atu foti medida sira karik númeru moras ne'e aumenta," dehan nia.

Nia hatutan, ne'e mós para la presiza atu halai fali ba iha estadu emerjensia karik iha situasaun moras aumenta, maske públiku dehan moras laiha maibé nivel mundiál ka Timor-Leste mós iha kondisaun di'ak moris ho normál.