"Presu fós importadu, ne’ebé fa’an iha armazein empreza importadór sira nian no fa’an fila-fali ba konsumidór sira iha loja sira ne’ebé fa’an fós ho kuantidade uitoan, ne’ebé ema barak liu maka konsume, estabiliza ho valór $0,50 sentavus kada kg," dehan komunikandu ne'ebé Online INDEPENDENTE sita, Kuarta (27/09).

Benefisiárius husi medida ida ne’e, empreza sira ne’ebé fa’an ho kuantidade boot ka operadór ekonómiku sira ne’ebé komprova, liuhusi kópia autentikada husi Autoridade Aduaneira, katak sira importa no simu ona kuantidade fós ho karaterístika ne’ebé define ona iha diploma ne’e, simu valór hamutuk dolar amerikanu $5 kada foos ho 25kg ne’ebé importa ka fa’an.

Entretantu, diploma ida ne’e determina mós konstituisaun stock suplementár ida ba seguransa fós ho tonelada rihun 30, hodi rai iha armazein Sentru Lojístiku Nasionál (SLN), ne’ebé destina ba intervensaun sosiál iha situasaun emerjénsia, liuliu, inundasaun, katástrofe naturál, motivu sanitáriu sira, solidariedade sosiál no atu fornese ba empreza grosista sira hanesan, empreza sira ne’ebé fa’an ho kuantidade boot karik presiza.

Enkuantu, implementasaun husi média ida ne’e, ninia objetivu mak atu satisfás nesesidade alimentár populasaun sira nian ho folin ida ne’ebé asesivél liu, hodi kompensa empreza importadóra sira husi folin importasaun nian no kria stock minimum hamutuk fós tonelada rihun 30 ba situasaun emerjénsia.

Períodu vijénsia husi medida ida ne’e maka loron 180, hafoin diploma ne’e tama iha vigór, iha loron tuir mai husi ninia publikasaun.