“Fundu ida-ne’e iha personalidade jurídika, autonomia administrativa, autonomia finanseira alargada no autonomia patrimoniál, ne’ebá mai ho objetivu atu finansia programa no projetu anuál no plurianuál, ho karater sosiu-ekonómiku no ambientalmente sustentável, destina ba dezenvolvimentu territóriu no populasaun munisípiu Ataúro nian,” dehan Ministru Prezidénsia Konsellu Ministru interinu, Rui Augusto Gomes, iha Palásiu Governu, kuarta nee (30/03)
Enkuantu, FEDA prezide husi Prezidente Munisípiu Ataúro no tutela husi Primeiru-Ministru, Taur Matan Ruak.
“Parlamentu Nasionál aprova tiha ona lei númeru 1/2022, ne’ebé promulga ona husi Prezidente Repúblika, ba fundu ne’ebé ho valór millaun $13. Osan ida-ne’e finansia projetu sira ne’ebé liga ho ambiente, turizmu, infraestrutura no seluk tan,” nia esplika.
Autoridade sentrál estabelese Administrasaun Munisipál Ataúro ho ninia kompeténsia sira hanesan munisípiu sira seluk, maibé iha kompeténsia adisionál iha área ambientál no turizmu komunitáriu.
Enkuantu, iha loron 31 maiu 2021, Parlamentu Nasionál aprova Proposta-Lei Divizaun Administrativa Territóriu ho unanimidade, nune’e, Loré no Hatulia B sai postu administrativu foun no Ataúro sai munisípiu foun iha 01 janeiru 2022.
Aliende, iha tinan 2022, Governu prevee orsamentu ba Ataúro nu’udar munisípiu foun, ho montante $2.508.100, kompostu hosi saláriu no vensimentu $484.932, bens no servisu $990.797, kapitál menór $728.100, kapitál dezenvolvimentu laiha, no transferénsia públika $304.271.
Entretantu, iha loron 09 marsu 2022, Governu nomea Domingos Soares hodi asume kargu Administradór munisípiu Ataúro iha rejime komisaun servisu, ba períodu tinan-tolu, sura hosi loron simu pose.
