Tuir Ministru Administrasaun Estatal (MAE), Miguel Pereira Carvalho, hateten, serimonia distribui materiál hahú husi Munisípiu Ermera no sei kontinua ba munisípiu seluk inklui Ataúro no Rejiaun Administrativa Espesiál Oécusse Ambeno (RAEOA).

Tuir planu, distribuisaun tuir mai sei realiza iha Munisípiu Baukau, Dili no munisípiu sira seluk no sei konklui iha fulan-abríl 2022.

Aleinde ne’e, Miguel hateten, Governu mós halo ona reabilitasaun ba sede suku hamutuk 400 iha territóriu nasionál no restu (52) sei reabilita iha tinan 2023.

“Materiál eletróniku hanesan komputadór ida, mákina imprime ida no Uninterruptible power supply (UPS-sigla inglés) ida. Sasan eletróniku hirak ne´e atu ajuda hadi’a funsionamentu ba administrasaun suku hodi tau-matan ba interese públiku nian,”dehan nia liu husi komunikadu ne'ebe Online INDEPENDENTE asesu, tersa, (29/03).

“Hau hakarak dehan ba xefe suku hotu katak obrigasaun no dever Governu nian mak fasilita suku sira ho meiu rekursu ne’ebé adekuadu nune’e suku bele ezerse sira-nia atribuisaun tuir Lei Suco, Lei nú 9/2016 hodi nune’e bele tau-matan ba povu nia moris”, nia relata.

Enkuantu ho atribuisaun ekipamentu hirak-ne’e, MAE apela ba xefe suku sira hotu no membru Konsellu Suku nian atu kolabora ho adminitrasaun lokál Estadu no Administrasaun Sentrál hodi tau-matan ba interesse públiku no komunidade nian iha suku sira.

Entrentantu Iha serimónia atribuisaun ne’e, MAE mós lansa plataforma informátika Sistema Integrado Gestão Administrasaun Sucos (SIGAS) ho nia objetivu atu rejista livru suku sira iha forma eletrónika no ONLINE.