Tuir Ministru Koodernador Asunto Ekonomiku (MKAE) Joaquim dos Santo Amaral, hatete, nia senti haksolok ho funsionariu foun na’in 11 husi IADE neebé simu ona pose, ida nee sai mós balansu entre feto no mane.

"Ha'u hanoin sinal di'ak ida ba iha IADE katak, sira kumpri duni programa jeneru balansu, ne'ebé fó oportunidade bo'ot ba feto, maibé liu husi kualifikasaun mak sira liu, ne'e hatudu katak ita nia feto timor ho tempu ba tempu prepara diak liu tan atu partisipa ativa iha funsaun publiku nian," dehan nia ba jornalista sira hafoin partsipa iha tomada pose, iha edifisu IADE, Mandarin, tersa horseik (29/03).

Nia hatutan, iha instituisaun seluk mós partisipasaun feto iha numeru bo’ot, tanba nee, objetivu atu promove feto hola parte iha aspetu hotu-hotu husi atividade ekonomiku nian sai ona realidade.

"Ha'u fiar katak ho funsionáriu foun sira ne'ebé simu ona kna'ar, inklui feto na'in 7 bele ajuda di'ak liu tan IADE atu kumpri ninia papel hodi hala'o sevisu di'ak liu tan,"dehan nia.

Iha oportunidade nee, MKAE husu ba parte IADE atu bele hadia atendimentu ba sidadaun sira ne'ebé hakarak hahú sira nia negosiu.

Tanba haree ba IADE, iha ninia estratejia servisu rasik hodi fó formasaun ba emprezariu sira neebé barak liu mai husi feto sira.

"Ida ne'e hatudu katak feto maluk sira iha motivasaun bo'ot atu aproveita fasilidade sira ne'ebé iha, husi Governu ba iha instituisaun sira hotu, liu-liu ba iha IADE, no aproveita formasaun sira ne’ebé diak liu, atu bele sai emprezariu ne'ebé di'ak," tenik nia.

Iha fatin hanesan, Diretór IADE Filomeno Marcelino, hatete, durante ne'e sira  servisu ho deit funsionáriu na'in 90 iha teritoriu laran tomak, ida nee tuir nia numeru neebé uituan los.

Nia dehan, entaun iha tinan kotuk sira mós rekolla proposta atu halo rekrutamentu ba funsionáriu sira, nunee konsege fó pose ba funsionariu na’in 11 nee.

“Ami espera katak sira nia prezensa bele tulun ona instituisaun hodi fó atendimentu ba programa ne'ebé IADE iha, ba sosiedade iha teritoriu tomak," dehan Diretór.

Enkuantu, funsionáriu na'in 11, inklui feto na'in 7 sei ba hala’o servisu iha munisipiu sira hanesan Aileu, Ainaro, Bobonaro, Baukau, Dili, Manatutu.

Nia akresenta, parte IADE tau atensaun liu ba asuntu jeneru, nunee iha instituisaun IADE nian hahú husi estrutura to’o mai iha xefe departamentu kuaze maioria feto.

Ho nunee, nia dehan, funsionáriu feto ne'ebé servisu  iha Instituisaun IADE hamutuk na'in 39.

Entretantu, Prezidente CFP, Francisco Cardozo Gomes, hatete, funsionáriu hirak nee sai testamuña ba eventu solene ne’ebé ho sentidu bo'ot iha kontextu funsaun publika nian.

Tuir nia, funsionariu 64% husi na'in 11 ne'e feto hotu, ida ne'e hatudu komprimisu no avansa bo’ot ida, hodi promove partisipasaun feto sira nian aas liu tan, iha servisu publiku nian.

"Ha'u lori komisaun funsaun publika nia naran, hato'o kongratula ba imi, no seijam bem vindo iha familia bo'ot iha institutu refere, mai ita hamutuk, oinsa asegura servisu ida ne'ebé ezentu, emparsial, ho responsabilidade, servisu ho kualidade, no haktuir ba padraun kualidade ne'ebé aas," hakotu nia.