Aprovasaun lei rua ne’e halo hafoin Xefe Negosiadór Fronteira Maritíma, Kay Rala Xanana Gusmão, Autoridade Nasionál Petrolíferu no Minerais (ANPM), no Ministériu Finansas halo aprezentasaun iha Konsellu Ministru Estraordináriu, Segunda (8/7).

Alterasaun lei hirak ne’e, ohin Tersa (9/7), sei aprezenta ba Parlamentu Nasionál (PN) atu halo diskusaun, aprovasaun no lori ba Prezidente Repúblika hodi promulga, antes tama ba loron 30 Agostu, data ba ratifikasaun akordu Delimitasaun Fronteira Maritíma.

Ministru Estadu Prezidénsia Konsellu Ministru, Hermenegildo ‘Agio’ Pereira hateten, tuir planu antes aniversáriu Loron Konsulta Populár iha ona troka nota hodi konfirma katak Parlamentu Timor-Leste ratifika ona tratadu entre Commonwealth Austrália ho Repúblika Demokrátika Timor-Leste.

Maski nune’e, reuniaun Konsellu Ministru rasik seidauk remata, sei kontinua fali, ohin, Tersa (9/7), hodi diskute fila dekretu lei sira ne’ebé iha ligasaun hodi hetan aprovasaun hafoin haruka ba Prezidente Repúblika promulga.

Bainhira PN ratifika iha dia 30 Agostu ba Prezidente haruka públika, maka tratadu foun ho fronteira maritíma permanente, mapa iha tratadu ne’e Timor-Leste nian mesak ona.

“Akordu hotu-hotu ne’ebé halo ho ConocoPhillips no Woodside kona-ba Bayu Undan, Kitán no Búfalo ne’ebé iha akordu ne’e tama ona mai Timor nia territóriu, kontratu sira ne’e tenke hadi’a, ajusta hodi aserta ho tratadu fronteira maritíma permanente”, tenik nia.