Akontesementu ne’e rezulta uma-kain 208 mak hetan estragus total no ema na’in 972 mak lakon sira nia hela fatin no sasan uma laran.

Hafoin akontesementu, ekipa konjunta kompostu husi Sekretariu Estadu Protesaun Sivil (SEPS) Joaquim dos Reis Martins, Vise-Ministra Solidariedade Sosial no Inkluzaun (V-MSSI) Signi Verdial, Sekretariu Estadu Komunikasaun Sosial (SEKOMS) Mericio Juvinal Akara no Ministru Administrasaun Estatal (MAE) Miguel Pereira de Carvalho.

Inklui mós Ministra Saúde (MS) no Ministru Turismo Comersio Industria (MTKI) José Lucas do Carmo, tun direita hodi observa fatin akontesementu refere.

Nune’e, apoia ona ekipamentus balun hodi asegura vitima insendiu sira.

Sekretariu Estado Protesaun Sivil (SEPS), Joaquim dos Reis Martins hatete,  ohin konjunta hamutuk hodi kolabora ho Xefe Suku no Xefe Aldeia sira hodi deside fó atendementu urjenti ba komunidade sira.

“Ekipa konjunta hamutuk ho SEPS mobiliza kedas tenda 65, tanki bee no ekipamentus sira seluk ba vitima sira, hodi bele utiliza iha fatin ne'ebé mak deside hodi bele akomoda sira iha oras 24 nia laran,”dehan nia ba jornalista sira iha eis-merkadu Comoro, Aldeia 03, Suku Fatuhada, kinta ne’e.

Aliende, ekipa konjunta oferese mós hahan tasak ba vitima sira, hodi tahan netik sira nia kabun.

Entretantu, Vise-Ministra Solidaridade Sosial no Inkluzaun (V-MSSI), Signi Chandrawati Verdial hateten, ohin MSSI mai iha fatin ne'e nia papel mak oinsa hare ba grupo vulneravel sira hanesan ferik-katuas, inan isin-rua, bebe, no mós ema ho defisiensia sira, hodi atende pakote nutritivu no apoia úmanitaria ruma hanesan fós, mina no hahan ba sira.

Governante ne’e hatutan, antendimentu ne'ebé urjente ba vitima sira mak tenki mobiliza sira oras 24 nia laran, atu bele iha apoia aihan no fatin toba ba sira, hafoin hare fali iha faze tuir mai.

Tuir nia, dadus provizoriu vitima sira ne’ebé ekipa konjunta rekolla uluk hamutuk uma kain 500.

Xefe Aldeia 03, Suku Fatuhada, Jeferino Braz hatete, tuir dadus provizoriu husi Aldeia 03, Fatuhada uma-kain hamutuk 500.

tuir nia, dadus ikus ne'ebe ekipa sira rekolla, vitima hamutuk 972 no uma kain 208 mak estragus total, seluk sasan balun mak estragus.

Asistente Editor: Saturnina da Costa