Ministru Prezidensia Konsellu Ministru Fidelis Leite Magalhães hatete, iha realizasaun no apresentasaun husi Ministru administrativu Estatal no Ministeriu obras publiku  ne'ebe hatudu ho impaktu husi inundasaun no resposta emergensia nian no atu halo repara ba estagus sira.

“Dadaun ne'e ema hamutuk na’in 731 mak hela iha Sentru Akollamentu 6 ne'ebé sei ativu iha Munisipiu Dili,”dehan nia iha Palasiu Governu, kuarta horseik (28/07).

Sentru akollamentu 6 ne’ebé sei ativu hela mak hanesan, Dom Bosco Comoro, Kapela Hera, EBC-Akanunu, Kampu Real Madrid Manleuana, Restorante Metiaut no Rate-Ain.

Entretantu, total ema ne’ebé mate iha akontesementu dezastre naturais hamutuk na’in 34  no na’in 14 mak lakon.

Iha teritoriu nasional total familia na’in 30.322 mak afetadu ba inundasaun  entre familia sira ne’e iha Munispiu Dili hamutuk 24.816 no uma-kain 4.231 mak hetan estraga total.

Nune’e, Ministeriu Administrasaun Estatal (MAE) hamutuk ho Ministeriu Obras Públika (MOP) dezenvolve ona planu atu hari alojamentu multifunsaun hodi hatan ba sira emergensia nian, mak hanesan kontribuisaun prosesu re-organizasaun urbana no politika desentralizasaun  administrativa no poder lokal.

Governante ne’e dehan, kona-ba resposta Governu nian, ba apoiu umanitáriu emerjénsia, mobiliza ona rekursus umanus no disponibiliza ona beins materiál sira, ekipamentu sira, be’e no ai-han, ai-moruk no nesesidade sira-seluk ba populasaun afetadu.

Enkuantu, kona-ba obras públikas, hala’o ona atividade nesesária sira hanesan limpeza, normaliza dalan públika no rekonstrusaun ba infraestrutura sira. Durante aprezentasaun, aprezenta mós projetu sira ne’ebé la’o hela ka sei dezenvolve iha kurtu no longu prazu, la’os atu rezolve de’it estragu sira ne’ebé identifika ona, maibé atu prevene no reduz risku sira husi dezastre sira tuir mai no kria infraestrutura sira ne’ebé rezilente liu.

Asistente Editor: Saturnina da Costa