Diretóra Fundasaun Caucus Terezinha Maria Noronha Cardoso hatete, Fundasaun Caucus hamutuk ho Plan Internasional Timor-Leste (PITL) realiza kolokio ne’e ho objetivu atu haforsa feto, joven no ema ho defisiénsia atu partisipa ativa no kompete iha eleisaun.
Nia dehan, eleisaun suku realiza kada tinan hitu, no haree katak, partisipasaun feto mmenus tebes. Tanba iha tinan 2016 iha deit feto 5% ka na’in 21 deit mak eleitu ba xefe suku.
Nia dehan, maske lei fó dalan ba feto atu kompete iha eleisaun sira, maibé nafatin promove sira liu husi sira nia perfil kandidatu sira nian.
Tuir nia, kandidatu feto ba eleisaun suku tinan ida ne’e hamutuk 241 mai husi munisipiu sira iha teritoriu Timor-Leste.
“Fundasaun Caucus kolabora ho Plan Internasional realiza foka liu oinsá atu promove pefil kandidatura feto maluk sira ne`ebé hamutuk 241 husi munisipiu 13 inklui RAEOA ne`ebé manifesta ona sira nia kandidatura hodi fortifika liu, asaun sira ne’ebé feto sira foti ne’e pozitivo, signifikativu, ita hare katak feto rasik iha inisiativa hodi kompete iha eleisaun suku ne’ebé mai,”dehan nia iha Salaun Delta Nova, tesa (24/10).
Iha fatin hanesan, Diretóra Interina Plan Internasional Fátima Estrela Soares hateten, liu husi kolokio ida ne’e, bele hasa’e númeru pertisipasaun feto sai xefe suku ba periodu 2023-2030.
“Ami fiar katak feto no foin sae feto sei ativu hodi lori mudansa no suporta empodera adolesente no joven sira partikularmente labarik feto hodi foti asaun koletivu ba mudansa sistema no politika neebe kontribui ba realizasaun ba direitu umanu no igualdade jeneru,”dehan nia.
Entretanu, tuir dadus husi STAE, Timoroan na’in 2.117 mak kandidata an ba xefe suku, husi suku 442 iha teritoriu Timor-Leste tomak. Enkuantu, husi númeru ne’e iha mane na’in 1.876 ka 88,62% no feto na’in 241 ka 11,38%.
