"Ohin atividade tour asesibilidade ho kolega defisiensia sira hotu ho nia representasaun ho objetivu atu hare edifisiu públiku ne'ebé eziste ona no liliu ba atendimentu públiku, tanba ita nia maluk defisiente sira mós assesu ba atendimentu públiku sira ne'e, tanba fatin hirak ne'e asesibel ka lae ba ita nia maluk defisiente sira,” dehan Ofisial Open Book, Luciano Cabral, iha Edifisiu Notariado Mandarin, tersa (24/10).
Iha fatin hanesan, Jezuino de Araujo hatete, fatin sira ne'ebé sira observa kuaze la asesivel ba ema ho defisiénsia ne’ebé ho tipu diferente no ninia nesesidade ne’ebé la hanesan.
"Kona ba ha’u nia observasaun ne'ebé mak ohin ita la'o ona iha Banku Nasional Timor-Leste (BNCTL-Sigla Portugés) ninia asesibilidade menus tebes, nune'e ema ho defisiénsia fiziku uza kadera roda hanesan ha'u susar tebes atu tama ba edifisiu refere. Tanba bainhira kliente sira atende ita kleur, ita presiza ba haris fatin maibé iha fatin refere la iha asesibilidade", dehan Jezuino de Araujo.
Aleinde, Vitorina Savio mós lamenta, fatin ne’ebé sira observa laiha asesibilidade. Tanba ne’e sira sujere ba Governu bainhira halo rekonstrusaun ba edifisiu públiki sira presiza tau atensaun mós ba asesibilidade ba ema ho defisiénsia nian.
