Diretora Nasionál Transporte no Terrestre, Maria Antonia Vitor da Costa informa, iha trimester dahuluk tinan ne’e, Diresaun Nasionál Transporte no Terrestre liu husi ninia atividade sira konsege rekoila ona reseita lubuk ida.

Reseita husi atividade hirak ne’ebé DNTT halo ne’e ho total tokon $1.512.389.

"Orsamentu sira ne'e mai husi item karta kondusaun, lisensa tranzitu, no mós sira seluk. Iha primeiru trimester, fulan Janeiru to'o Marsu tinan ne'e mak DNTT rekolla orsamentu ho nia montante millaun $1.512.389," informa Maria ba jornalista INDEPENDENTE, iha nia knar fatin, Kaikoli, Kinta (10/04).

Iha tinan 2024, Diretora ne’e informa, total reseita ne’ebé DNTT konsege rekoila iha ninia atividade sira ho montante tokon $15.

Laiha osan hadia Zebra Cross

Iha tinan ida ne’e, Diresaun Nasional Transporte no Terrestre (DNTT) la halo reabilitasaun ba Zebra Cross iha estrada kapaital Dili tanba laiha orsamentu.

Diretora DNTT, Maria Antónia hatete, nia parte iha planu atu hadia Zebra Cross iha Dili ne’ebé moos ona, maibé infelismente planu refere la hetan aprovasaun.

"Tinan ida ne'e ami-nia planu iha, (maibé) la hetan aprovasaun, entaun ami labele halo buat ida tanbà orsamentu laiha," dehan Maria.

Iha OJE ba tinan 2026, nia dehan, DNTT sei propoin fila fali orsamentu atu bele hadia Zebra Cross iha kapital Dili.

"Tinan oin ami sei propoin fila fali planu ne'ebé mak ami iha ona atu bele reabilita, pinta foun fali marka Zebra Cross ne'ebé mak ita haree moos hotu ona," katak nia.