Diretór Ezekutivu Asosiasaun Defisiensia Timor-Leste (ADTL), Cesario da Silva hatete, iha tinan ida ne’e EhD na’in 30 mak asesu ba UNTL.
"Na'in 30 ne'e mak foin daudauk tama iha universidade no agora daudauk hala'o sira-nia estudu iha universidade," dehan Cesário ba jornalista INDEPEDENTE hafoin kolokiu ba média ho tema ‘Média sai Ajente Transformadór ba Lian Ema ho Difisiensia nian’ iha eskritóriu ADTL, Maskarinhas, Dili, Sesta (11/04).
Maske nune’e, nia dehan, universidade nasionál ne’e seidauk iha fasilidade ne’ebé asesivel ba ema ho defisiensia.
“Difikuldade mak kolega sira ho kadeira roda, obriga an ema tenke hiit sira. Aleinde ne’e maluk sira ho problema tilun. Agora kolega defisiensia tilun lubuk ida mak eskola iha UNTL, universidade laiha kondisaun, liu-liu fasilita ho ema lian jestual ba sira, nune'e mós difisiensia matan sira, professor sira tenke iha koñesimentu oinsá uza brael fasilita informasaun ba sira.”
Difikuldade ne'ebé EhD barak hasoru iha universidade mak fasilidade no manorin sira-nia koñesimentu atu akompaña sira.
"Ami haree sira vitíma liu, fasilidade sira ne'e, purezemplu ita ko'alia biblioteka universidade nian ema ho difisiensia ba labele, ate selu de'it propinas, sira atu ba banku, sira ba fali administrasaun de'it.”
“Entaun difikuldade boot liu fasilidade públiku sira, liu-liu iha universidade asesu fíziku nian ne'e mak limitasaun boot liu,” dehan nia.
Ho nune’e, ADTL husu ba Ministériu Ensinu Superiór, Siensia no Kultura, no UNTL atu hadia kondisaun sira iha universidade hodi bele asesivel ba EhD.
Aleinde ne’e, nia hatutan, tenke hanoin ona halo kapasitasaun ba dosente sira kona-ba nesésidade espesiál EhD. Ezemplu lian jestual no brael.
Molok ne’e, Ministru Ensinu Superiór Siénsia no Kultura, José Honório hatete, EhD nia asesu ba ensinu superiór ne'e importante.
"Ema ho defisiénsia asesu ba edukasaun ne'e importante mós, asesu ba universidade ne'e importante. Ita labele hatete ema ho defisiénsia la matenek, sira balun ne'e matenek tebes, ne'ebé sira iha liberdade tomak atu asesu ba kursu sira iha ensinu superiór," dehan nia.
Iha UNTL, nia dehan, iha Departamentu Dezenvolvimentu Komunitáriu ne'ebé foku ba ema ho defisiénsia sira.
