Tuir dadus, iha fulan tolu ne’e nia laran bebé na’in 1.554 mak moris, kompostu husi bebé mane na’in 817 no feto na’in 737.

Xefe Departamentu Maternidade Hospitál Nasionál Guido Valadares (HNGV), Zinia Mascarenhas informa, iha fulan Janeiru bebé na’in 444 kompostu husi mane na’in 250 no feto na’in 194.

“Partus normál 273, caesarean section 110, vacum 52. Bebé kaduak hamutuk tolu. Bebé moris normál hamutuk 361, bebé pesu la normál hamutuk 68. Bebe mai ho kondisaun la normál hamutuk na'in 9,” informa Xefe Departamentu ne’e iha nia knar-fatin, Tersa (08/04).

Husi total ne’e, bebé na’in 12 mak fila hikas.

Iha fulan Fevereiru, bebé na’in 539 mak moris, kompostu husi mane na’in 269 no feto na’in 270.

“Totál partus hamutuk 539. Partus normál 361, caesarean section 119, vacum na'in 43, kaduak 12. Pesu normal 421, pesu la normál 81 no mal pozisaun 16.”

Husi total bebé ne’ebé moris iha Fevereiru, na’in 28 mak mate iha inan nia kabun laran.

Ba fulan Marsu, Zinia informa, total bebé ne’ebé moris hamutuk na’in 571, kompostu mane 298 no feto 273.

“Partus normal 380, caesarean section 142, vacum 36, kaduak 10, mal pozisaun 13, pesu normál 465, pesu la normál 75."

Iha fulan ne’e, Zinia hatutan, bebé na’in 12 mak mate iha inan nia kabun. Ho nune’e, iha fulan tolu ne’e total bebé na’in 52 mak mate.

“Bebé ne'ebé mak mate iha kabun laran maiória infeksaun barak liu maibé sira ladún fó importánsia hodi hakbesik an ba sentru saúde ou pesoál saúde sira hodi hetan tratamentu di’ak.”

Nia hatutan, kauza seluk husi bebé mate tanba inan mós hetan ona moras antes, hanesan hipertasaun kroniku no preeklamsia.

“Preeklamsia ne’e mós fó impaktu ba inan sira hodi halo bebé mate iha kabun laran," nia esplika.

Aleinde bebé ne’ebé mate, nia dehan, iha fulan tolu ne’e iha mós inan na’in haat mak lakon vida tanba problema ho raan fakar.

Enkuantu, iha sala maternidade iha pesoál saúde na’in 50, kompostu husi parteira na'in 42  no espesialista na'in ualu.