Diretor Jeral-ME Antoninho Pires hetete, manorin hirak ne’e, asina kontratu iha tinan 2022, maibé seidauk simu sira nia direitu.
Tanba ne’e, governu sei selu sira hahú iha fulan-Janeiru to’o Agostus tinan ne’e.
“Profesor kontratadu foun ne'ebé agora dadaun seidauk simu sira nia salariu, komisaun fó sai ona katak selu lai husi fulan-Janeiru mai too iha Agusto,” dehan nia iha knar fatin, ME, Vila-Verde, segunda (21/08).
Nia dehan, Governu sei selu manorin sira ne’e durante fulan rua nia laran, hahú husi Agostu to’o Setembru tanba haree ba númeru dadus númeru profesores sira nian ne’ebé iha.
“Haree ba dadus ne'e barak liu, entaun balun komesa simu iha Agusto nia laran no balun sei simu fali iha Setembro nia laran,”tenik DJ.
Entretantu, molok ne’e, Prezidente Komisaun Funsaun Públika (KFP), Faustino Cardoso lista manorin kontratadu husi Ministériu Edukasaun iha mandatu oitavu Governu ne'ebé haruka ba KFP iha fulan-Maiu ne'ebé besik ona eleisaun, tanba ne'e Komisaun deside hodi suspende.
Prezidente dehan, komisaun hasai sirkular ida tanba iha momentu ne'ebá ligadu ho kontratasaun Governasaun no rekrutamentu ho nune'e deside hodi suspende.
"KFP hasai sirkular ida tanba iha momentu ne'eba ne'e ligadu ho kontratasaun, Governasoens no rekrutamentu, tanba ne'e komisaun deside suspende hodi hein IX Governu konstituisional mai, tanba iha periodu ne'ebá eleisaun hatudu katak tranzisaun Oitavu Governu mai iha nonu Governu, ne'ebé Komisaun deside hodi suspende,”dehan nia, hafoin partisipa iha diskusaun ba Programa IX Governu nian, iha Parlamentu Nasional, tersa (18/07).
Nia esplika, prosedimentu tomak la'o iha ME Oitavu Governu Konstituisional, maibé iha dokumentu balun ne'ebé Komisaun tenki konfirma, liliu hare kona-ba vaga, orsamentu Ministériu nian ne'ebé atu selu ba manorin sira no tenki kontempla iha livru Orsamentu Jeral númeru-2, Parlamentu Nasionál (PN) maibé la iha ne'ebá.
"Maske sira prense prosedimentu balun hanesan públikasaun iha Jonál de Repúblika no kestaun tékniku sira seluk nian maibé iha livru orsamentu Jeral no.2 Parlamentu Nasional la iha ,Prontu situasaun hotu kabe ba Ministra Edukasaun IX Governu hodi hato'o ninia konsentimentu, hanoin no desizaun kona-ba situasaun ida ne'e, bainhira desizaun mai ami selu," nia hakotu.
