Diretór Gabineti Relasaun Externa no Komunikasaun-APS Anacleto Caitano, husu ba komunidade sira ne'ebé hela iha fatin risku hanesan foho lolon no ai-okos atu kuidadu an atu nune'e labele hetan dezastre.

“Ita hare gráfiku husi tipo dezastre ne'ebé iha maioria iha rai-halai liliu akontese iha Munisipiu Ainario, tan ne'e fó hanoin nafatin ba maluk sira ne'ebé hela iha foho lolon sira atu bele toma atensaun nafatin no kuida ita nia an kuida sasan no rikusoin ne'ebé ita iha,” dehan nia iha Salaun Konferensia APS, Kaikoli, segunda (21/08).

Diretór dehan, ba komunidade sira ne'ebé hela iha fatin risku ba anin boot, atu uza konsensia rasik hodi muda ba fatin ne'ebé seguru atu asegura an, familia no rikusoin sira.

Entretantu, tuir dadus ne’ebé Autoridade Protesaun Sivil rejista durante semana ida nia laran, hahú husi loron 15 to’o 20 fulan-Agostus 2023 hamutuk uma 18 mak hetan estragus husi dezastre naturais.

Enkuantu, tipu dezastre naturais ne’ebé akontese mak hanesan, rai halai, anin boot no mós ahi han.