Tuir dadus husi Komisaun Nasionál Kombate HIV/SIDA no Ministériu Saúde, hahú husi fulan Janeiru to’o Abril tinan ne’e, ema na’in 52 mak deteta pozitivu HIV/SIDA.
Ho númeru ne’e, total kazu HIV/SIDA iha Timor-Leste sa’e ba na’in 1.582.
Sekretariu Ezekutivu Komisaun Nasionál Kombate Virus HIV/SIDA, Atanasio de Jesus hatete, tuir dadus iha fulan haat inisiu tinan 2022 númeru kazu HIV/SIDA sa’e.
“Husi kazu ne’e mós kazu mate aumenta, iha 2021 kazu mate hamutuk 176, tinan ne’e sa’e ba 268,” dehan nia hafoin sensibilizasaun informasaun Kombate HIV/SIDA, iha Eskola Tekniku Vokasionál São Miguel, Segunda (30/05).
Ho númeru kazu ne’ebé aumenta kada tinan, nia dehan, KNKHS kontinua esforsu hodi sensibiliza foin-sa’e sira atu prevene aan husi virus ne’e, liu-liu oinsa ema idaidak kuida aan atu labele sai vitima ba virus ne’e.
Maske nune’e, tuir nia knar ne’e laos komisaun nian de’it maibé entidade hotu tenke servisu hamutuk.
“Edukasaun husi familia importante tebes, bainhira inan-aman tuur hamutuk ho oan tenke fahe esperiensia, fahe ideia ne’ebé pozitivu ba oan relasiona ho virus HIV/SIDA nian atu sira bele iha koñesimentu di’ak nune’e bainhira oan sira sai ba ambiente seluk, hatene ransu livre, bele prevene aan no sai husi mundu relasaun seksual livre,” dehan nia.
Iha oportunidade ne’e, Atanasio husu ba professor sira oinsa tau asuntu HIV/SIDA nian iha kurikulu hodi sira bele iha diskusaun, nune’e bele aumenta kapasidade no koñesimentu ba iha stigma no kombate HIV/SIDA ho di’ak.
Aleinde iha TL, nia dehan, tuir dadus kazu HIV/SIDA mós sa’e maka’as iha Atambua, Indonezia.
“Kuaze ema 2.000 resin mak afeta ona, ho ida ne’e Institutu Nasionál Kombate HIV/SIDA tenke intervene direita ba liña fronteira, hahú husi RAEOA to’o Maliana,” dehan nia.
Iha fatin hanesan, Diretor Ensinu Sekundariu Eskola Tekniku Vokasionál São Miguel Arkanzu, Antonio Soares, louva Komisaun Nasionál Kombate HIV/SIDA, tanba tinan ba tinan sempre halo sensibilizasaun kombate HIV/SIDA ba estudante sira.
“Ami sente kontente tebes tanba komisaun sempre kolabora ho ami fahe informasaun, entaun iha ne’e ami seidauk deteta katak ami-nia estudante ida afeta ba kazu HIV/SIDA,” dehan nia.
