Portavoz Sentru Integradu Jestaun Krize (SIJK), Dra. Odete Viegas da Silva hatete, situasaun ne’ebé sai mós ameasa ba saúde públika iha Timor-Leste maka dengue.  Tanba ne’e, Ministériu Saúde halo intervensaun ba area afetadu sira ne’e.

“Kazu dengue hahú husi Janeiru to’o iha loron 27 fulan Abril ne’e hamutuk 1.050 kompostu husi Dili 628 no Ermera 293 no restu  munisipiu sira seluk,”dehan nia iha konferensia imprensa iha CCD, ohin.

Nia informa, to’o munisipiu Oekusse no Viqueque maka seidauk relata kazu dengue.

Nia mós informa, kazu dengue ne’e ema na’in walu (8) maka mate ona kompostu husi Dili na’in neen (6), Baukau ida (1) no Kovalima ida (1).

Nia husu ba komunidade sira atu hamoos nafatin sira ne’ebé bee nalihun hanesan iha vazu aifunan bee iha roda no bee iha botil. Tesi du’ut ne’ebé moris besik iha hela fatin, no haloot sasan sira halo di’ak.

Bainhira toba uza moskateiru, uza faru no kalsa naruk halo atividade iha fatin sira ne’ebé nakonu ho susuk.