Portavoz Sentru Integradu Jestaun Krize (SIJK) Doutór Rui Maria de Araújo hatete, kazu suspeitu Covid-19 sa’e ba 629 tanba aumenta husi kazu Likisa ne’ebé halo triajen.

“Total ema ne’ebé hein rezultadu laboratóriu 215 kompara ho horisehik 206, no kazu konfirmadu mantein 24,”dehan nia iha konferensia imprensa, iha CCD, ohin.

Nia informa, ohin loron laiha kazu foun ruma, total ema ne’ebé rezultadu laboratóriu negativu hamutuk 390, no kazu rekuperadu na’in neen (6).

Nia informa, ema ne’ebé iha konfinamentu obrigatóriu 436 kompostu husi Dili 324 no iha munisipiu 66. Ema ne’ebé halo auto kuerentena iha uma Dili na’in walu (8) no iha munisipiu sira 38. Ema ne’ebé kumpri ona loron 14 iha kuerentena hamutuk 1.712 kompostu husi Dili 1362 no iha munisipiu sira hamutuk 350.

Nia esplika, kazu konfirmadu no kazu provavel ne’ebé agora iha Timor-Leste sei nafatin restritu grupu hitu (7) seidauk iha transmisaun iha komunidade.

Husu ba komunidade atu kumpri nafatin protokolu husi Organizsaun Mundial Saúde (OMS) nian kuidadu nafatin ijiene pessoal fase liman bebeik mantein distansiamentu sosial nomós distansiamentu fíziku. Hakmatek iha uma kuandu la iha nesesidade ne’ebé importante iha li’ur. Sai ba li’ur tenke uza maskara.