Partidu mais votadu, FRETILIN, fiar katak partidu opozisaun sira sei vota a favór ba programa ne’ebé nesesita ho povu nia moris.

Prezidente Bankada FRETILIN, Francisco Miranda Branco, hateten FRETILIN sei prepara matéria substansiál ba programa no Orsamentu Jerál Estadu (OJE) hodi konvense partidu opozisaun sira ba kestaun importante Estadu nian.

“Ba programa, fiar katak sira (opozisaun) sei vota a favór ba interese nasaun hodi benefisiária povu no estabilidade nasionál”, dehan nia, iha Uma Fukun PN, Kinta (21/09).

Branco hatutan, partidu polítiku hotu-hotu iha interese ba povu no nasaun. Ne’e duni, opozisaun sei la ‘husik liman’ atu nasaun ne’e monu ba susar.

Tuir nia, rezultadu eleisaun iha 2017 hatudu nu’udar ezersísiu ida ba partidu polítiku hotu-hotu atu bele servisu hamutuk hodi alkansa objetivu dezenvolvimentu nasionál.

Antes ne’e, Primeiru Ministru, Mari Alkatiri, otimista katak opozisaun sira iha Parlamentu Nasionál apoiu Governu sei aprezenta programa ba interese povu no nasaun nian, hodi liberta sidadaun sira husik kiak no mukit.

PM Alkatiri hateten, prosesu hotu-hotu la’o mak haree, kuandu Governu aprezenta programa mak foin hatene partidu opozisaun vota kontra ka a favór.

“Governu halo programa atu serbí povu ida ne’e, atu hasai husi mukit no kiak atu lori dezenvolvimentu ba to’o fatin ne'ebé presiza”, dehan nia, hafoin soru-mutu ho Xefe Estadu, Francisco Guterres ‘Lú-Olo’, iha Palasiu Prezidensiál Ai-Tarak Laran, horisehik.

Tanba ne’e, Alkatiri husu ba deputadu opozisaun sira atu kolabora no kontribui-malu hodi hadi’a dezenvolvimentu nasaun no ba povu nia futuru.