Lei ne’ebé importante tebes hodi asegura futuru nasaun nian mak Lei Anti Korrupsaun (LAK).

Prezidente Parlamentu Nasionál, Aniceto Guterres hateten, atu diskute Lei Anti Korrupsaun ne’e depende ba vontade husi Governu no Parlamentu Nasionál, liuliu bankada parlamentár.

“Lei anti korrupsaun ne’e depende ba vontade husi membru Governu no bankada sira”, dehan nia Uma Fukun PN, Kinta (21/9).

Iha fatin hanesan, Vise-Prezidente Bankada PLP, Maria Angelita Lopes hateten, sira nia partidu kaer ba nia prinsípiu ne’ebé hatete ona iha kompromisu no kampaña eleitorál.

Ne’e duni, iha tempu badak sira sei dudu Lei Anti Korrupsaun mai iha meza PN hodi halo debate tanba lei ne’e prioridade tebes.

“Lei Anti Korrupsaun ne’e prioridade tebes ba nasaun ne’e. Ita hatene lala'ok prosesu iha rai ne’e ba dezenvolvimentu, maibé korrupsaun boot tebes”, dehan Angelita.

Nia hatutan, Estadu ne’e servisu atu promove boa governasaun, maibé kuandu laiha lei ne’e hanesan leaun laiha nehan. Tanba lei iha mak sei garante implementasaun boa governasaun kona-ba kombate korrupsaun.

Nia hateten, ba partidu ida-idak tenke kaer ba nia kompromisu eleitorál ne'ebé hato’o iha kampaña, tanba ne’e kona-ba Lei Anti Korrupsaun sira sei sai proponente forte hodi aprezenta ba diskusaun iha tempu badak.