Deputada Bankada Fretilin, Helena Martins Belo, husu governu kria kampu servisu rai-laran ba sira.
"Joven sira ne'ebé ba servisu iha rai-li'ur, ita sira dehan di'ak, eroi foun, hatama taxa ba ita-nia nasaun," dehan nia, iha Parlamentu Nasionál, horisehik.
Nia hateten, maibé see Estadu liuliu governu la kria kampu servisu rai-laran maka joven sira tinan-tinan ba li'ur númeru boot ba nafatin.
"Entaun mai lori nia família sai hotu depois husik rai-laran mamuk, ema seluk mak mai tama fali halo bisnis," nia relata.
Tanba ne'e, nia husu estadu ho Governu oinsá mak bele halo planu di'ak liu pelumenus la'ós fó fali fatin atu joven sira sai hotu de'it, maibé oinsá mós kria kampu servisu iha rai rasik atu sira mós konfortavel ba nia rain.
Iha fatin hanesan, Deputada Bankada Partidu Demokrátiku, Elvina Sousa Carvalho, kestiona servisu Sekretáriu Estadu Formasaun Profisionál no Empregu (SEFOPE) nia atendimentu joven sira ne'ebé halo teste ba lian Koreia nian.
"Ha'u lamenta no kondena SEFOPE tanba la konsege halo mekanismu ne'ebé efisiénte no efikásia atu bele halo prosesu rekrutamentu ida ne'ebé mak di'ak ho prezerva dignidade joven sira," nia kestiona.
Tanba nia haree situasaun ida ne'ebé triste no la simu tebes bainhira haree joven sira dudu-malu, sena-malu, balun tenke sa'e moru, depois balun tenke kanek.
"Ha'u husu esplikasaun no klarifiksaun tanba saida, maibé SEFOPE iha obrigasaun bainhira halo rekrutamentu ba prosesu ida tenke atendimentu ho di'ak," nia hateten.
Atu iha efisiénte no efikásia no nafatin preverva dignidade kada ema ida no kada joven ida ne'ebé atu tuir teste rekrutamentu.
"Ha'u lasimu kuandu haree joven barak ne'ebé mak dudu malu hodi ariska sira nia seguransa rasik no sira nia dignidade rasik. Sekretáriu estadu tenke fó respostas ke di'ak no devér atu hadi'a ba oin, situasaun ida hanesan ne'e labele akontese nafatin," nia informa.
Nia reforsa, hanesan reprezentante povu iha hotu devér atu kondena ba tratamentu ladi'ak ba joven sira.
"Tanba tratamentu sira ne'e refleta ba inkapasidade governantes relevantes ne'ebé mak halo tratamentu asuntu ida-ne'e," nia relata.
Tanba ne'e hanesan reprezentante povu la simu no kondena no husu ba oin hadi'a rekrutamentu ida ne'e no prosesu saida de'it tenke prezerva dignidade joven sira nian, tanba sira mak futuru nasaun ida-ne'e.
Iha fatin hanesan, Prezidente Bankada Frente Mudansa, Deputada Isabel Maria Barreto Freitas Ximenes, sente lamentavel tebes SEFOPE nia atendimentu ba joven sira.
"Ema tenke ariska nia vida hodi hetan netik atendimentu ida husi SEFOPE," Nia relata.
Aliende ida ne'e husu mós ba SEFOPE hodi haree prosesu rekrutamentu sira ne'ebé sei pendente hela.
"Sira ne'ebé mak pasa ona selesaun dokumentus saúde no seluk tán no hetan ona aseitasaun husi Kompaña relevante iha estranjeiru liuliu sira ne'ebé mak Austrália nian, maibé sira ne'e seidauk ba nafatin," nia relata.
Nia informa, sira-ne'ebé iha 2019 nian balun to'o agora seidauk aranka no sira ne'ebé 2020 ne'e mós butuk nafatin to'o agora.
"Ne'ebé husu ba SEFOPE karik rezolve kestaun sira ne'e tenke gradualmente atu labele butuk tán, ezemplu de'it mak ema sira 2019 no 2020 de'it seidauk ba agora, maibé foin lalais simu tán, ita butuk tán,ita la konsege bele rezolve," nia informa.
Tanba nia husu SEFOPE ba kestaun lista 2019 no 2020 ne'ebé pendente hodi bele rezolve lalais ho orijente.
