Asaun deputadu bankada partidu tolu ne’e deside entrega hikas karreta ba PN hodi husu estudante sira atu kontribui ba estabilidade no pás iha Timor-Leste.
Presidente Bankada CNRT, Natalino da Costa hatete, CNRT iha PN bazeia ba dekretu lei númeru 32/2011, 27 Jullu, kona ba jestaun no alienasaun dos bens moveis do estadu no mós lei númeru 12/2017 kona ba lei organizasaun no funsionamentu administrasaun lei parlamentár.
Tanba ne’e, liu husi Konsellu Administrasaun Parlamentár kompostu husi partidu haat CNRT, FRETILIN, PD no Frente Mudansa no mós reprezentante administrasaun PN hodi deside halo alienasaun tuir prosedimentu legál tomak ne’ebé iha inklui mós presu alienasaun nian tanba durante mandatu tinan lima nia laran deputadu sira ida-idak ne’ebé partisipa ba kustu manutensaun anuál karreta PN tuir desizaun Konsellu Administrasaun ne’ebé haktuir iha akta reuniaun Konsellu Administrasaun.
Natalino dehan, hafoin deputadu CNRT tetu didi’ak ba situasaun atuál ne’ebé hamosu polémika boot iha públiku kona ba presu alienasaun karreta Prado PN, no haree ba desizaun Presidente Parlamentu Nasionál hodi suspende prosesu alienasaun no mós banka CNRT iha PN halo diskusaun no tetu ba desizaun husi CPN no CDN partidu CNRT foti ona koluzaun hodi fó fila karreta Prado ba PN.
“Ami husi CNRT deside ona hodi fó hikas fila fali karreta 30 husi deputadu 30 bankada CNRT nian hodi la kontinua tuir prosesu alienasaun ba karreta Prado Parlamentu Nasionál,” dehan Natalino hafoin liu hosi konferénsia imprensa iha PN horisehik.
CNRT husu ba Presidente PN, Adérito Hugo da Costa atu kansela prosesu alienasaun karreta PN nian ba deputadu na’in 65 husi bankada haat.
Natalino hatete, CNRT deside hodi fó fila karreta ne’e ba PN la’ós tanba haree ba situasaun demonstrasaun ne’ebé akontese hodi ezije halo desizaun, maibé partidu CNRT hakarak atu kontribui ba estabilidade nasionál.
“Ami husi CNRT husu ba públiku atu kontinua mantein kria situasaun pás no estabilidade no hakmatek no matan moris neon na'in hodi fó apoiu másimu ba prosesu formasaun governasaun no mós prosesu ba negosiasaun fronteira Tasi Timor ne’ebé mak la’o hela,” dehan Natalino
Iha fatin ketak, Partidu FRETILIN liu husi nia Banka iha PN mós hato’o sira nia pozisaun ba alienasaun karreta Prado.
“Ami la presiza halo fali deklarasaun tanba karreta sira ne’e sei kontinua nafatin sai patrimóniu Parlamentu Nasionál,” dehan Vise Presidente Bankada FRETILIN Francisco Branco iha PN, horisehik.
Branco dehan, karreta deputadu Bankada FRETILIN sei uza too deputadu foun IV Lejizlatura simu pose iha Setembru foin entrega.
Deputadu ne’e rekoñese kolega deputadu balun muda ona xapa matríkula ba privadu no sira hahú troka hodi tau fali xapa PN nian.
Nia dehan, xapa matríkula ne’ebé deputadu balun troka ona ba privadu ne’e la sai problema, tanba despaxu ne’e mak vinkula ona tanba ne’e tenke fila ba patrimóniu parlamentu nian.
Nia hatutan, Parlamentu Nasionál hanesan órgaun soberania ne’ebé órgaun ne’e labele foti desizaun individuál, maibé ne’e órgaun kolejiál tanba ne’e desizaun hotu ne’ebé iha sira hakru'uk.
Entretantu Presidente Partidu Demokrátiku, Maria Lurdes Besa afirma pozisaun Bankada PD nian hodi deside sei la partisipa sosa karreta Prado ne’e, tanba karreta ne’e pertense ba patrimóniu estadu.
Nia dehan, deputadu PD sei entrega karreta ne’e ba Konsellu Administrasaun PN atu bele fó fila fali ba Deputadu IV lejizlatura hodi operasionaliza funsionamentu parlamentu nian.
Nia hatutan, prosesu sosa karreta ne’e sai polémika boot tanba ne’e estudante sira halo demonstrasaun hamosu anarkizmu ho parte PNTL.
Tanba haree ba problema hira ne’e, Bankada Parlamentu PD deside entrega karreta ne’e.
“Ami husi Partidu Demokrátiku foti ona medida sei la partisipa totalmente iha alienasaun karreta ne’e,” dehan Maria iha PN.
Xefe Bankada PD ne’e hatete, mandatu deputadu sira nian sei estende too iha semana rua, tanba ne’e deputadu na’in 8 sei kontinua utiliza karreta ne’e to’o mandatu remata kuandu IV lejizlatura hahá halo ona nia servisu.
Tuir nia, la iha ona nesesidade fa’an karreta no sosa karreta foun ba deputadu IV lejizlatura tanba karreta sira ne’ebé sira uza sei di’ak hela.
Entretantu iha parte seluk, Deputadu Bankada FRENTI Mudansa rasik too agora seidauk halo deklara ruma atu entrega fila karreta.
