Ministru Edukasaun, Armindo Maia hatete, formasaun ba Professores sira ne’e hala’o ona durante tinan tolu resin iha Munisipiu hotu, tanba ne’e professor hirak ne’e sei hala’o sira nia estajiu durante fulan tolu nia laran.

“Programa estajiu ba ita nia formador sira hamutuk 2,595 ne’ebé durante tinan tolu resin sira tuir ona formasaun professor, ho ida ne’e ita hala’o formasaun ba professor sira iha Munisipiu, atu nune’e hanorin liu husi programa baixarlatu,” dehan nia.

Tanba ne’e, Professor sira ne’ebé sei hala’o estajiu ne’e foku liu ba iha estudante ensinu báziku no terseiru siklu.

Entretantu, profesor Daniel de Araújo informa katak, sira sei rona orientador no prepara planu hodi tun ba estajiu.

“Ami sei rona ami nia orientador sira atu hahú ami nia estajiu pedagogika no atu prepara planu ba estajiu nian, atu nune'e orientador sira bele hare’e ami nia planu sira ne’e hodi ami bele ba hanorin estudante sire kada eskola  sira  iha munisipiu 12 no RAEOA,” dehan nia.

Nia dehan, formasaun ba professor sira ne’e hahú iha inisiu fulan-Marsu tinana 2018.

Tuir nia, lolos formasaun ne’e remata ona iha tinan 2020, maibé ho situasaun Covid-19, entaun foin mak remata iha tinan ida ne’e.

Asistente Editor: Saturnina da Costa