Diretora Ezekutiva FOKUPERS, Maria Fátima Pereira Guterres hatete, relatoriu peskiza implementasaun Lei Kontra Volensia Domestika (LKVD) hala’o durante tinan 12 liu ba, tanba lei ne’e hahú hetan aprovasaun iha 2010 to'o 2023.
Tanba ne'e, FOKUPERS hahú inisia fali peskiza ne'e hodi hare ba ninia implementasaun sira, inklui ninia progresu nomós lakunas ne'ebe iha, tanba relatoriu peskiza ne'e komesa iha fulan-Agostu 2022 ho objetivu atu kontribui mós ba halo revisaun LKVD nomós kodigu penal, tanba kodigu penal ho LKVD iha harmonizasaun.
"Relatoriu peskiza LKVD iha ninia programa importante ha'at (4) maka hanesan, halo advokasia ba vitima sira, fó asistensia servisu direita ne'ebe ita halo ba vitima sira, hanorin labarik sira oinsá atu hatene kona-ba asuntu igualdade jeneru no direitus umanus nian," dehan Maria Fátima Pereira Guterres hafoin lansa relatoriu peskiza LKVD iha,Manleuana, (13/01)
Nia informa, dadus iha tinan 2022 hatudu katak kazu violensia domestika iha numeru aas, tanba ne'e, nia parte sei esforsu maka'as hodi kombate kazu hasoru feto no labarik feto sira.
Fokupers nia servisu prinsipal mak servisu hodi kontra violensia bazeia ba jeneru no kazu kontra kualker tipu violensia ne'ebe halo ba iha feto, labarik feto no ema funeravel sira ne'e inklui ema ho defisiensia sira.
Iha fatin hanesan, Sekretaria Estadu Igualdade no Inkluzaun (SEII), Maria do Rosaria Fátima Correia hateten, lei N.7/2010 ne’e vigor iha 2010 no lei kontra violensia doméstika ne’e mai ho natureza mai ho krime pùbliku hodi vitima sira hato'o denunsia ba iha Ministeriu Publiku.
Nia dehan, durante implemantasaun no sosializasaun ba prevensaun lei kontra violensia doméstika iha ona konsiensia husi vitima feto maluk sira atu relata sira kazu tuir prosesu formal.
"Babain kazu violensia doméstika ne'ebe akontese iha uma-laran ne'e hanesan bikan no kanuru, maibe konseitu ida agora muda ema hotu-hotu iha ona konsiensia, tanba husi sosializaun ne'ebe halo hodi tulun ona vitima sira", dehan nia.
Ho nune'e, SEII hamutuk ho Ministeriu Justisa nomos autor tribunal sira inklui ajensia Internasional sira no mos sosiedade sivil sira nafatin halo sosializasaun ba iha LKVD.
Entretantu, iha serimonia lansamentu relatoriu peskija LKVD, hetan, partisipa husi, prevedor Direitu Humanos e Justisa, Reprezentante, Ministeriu Justisa, no Reprezentante Ministeriu Publiku, juis, sosiedade sivil, SEII, no mos membru Fokupers nian no seluk tan.
