Iha 28 Fevereiru, tuku 9.00 dader, ekipa Gabinete Inspeksaun Auditoria Saúde (GIAS), halo inspesaun surpreza ba Farmasia K24.

Tuir observasaun Jornalista INDEPENDENTE iha terenu, iha inspesaun husi GIAS ne’e identifika trabaladór sira, kompostu husi Timor-oan na’in lima no sidadaun Indonezia na’in lima, ne’ebé servisu iha Farmasia ne’e laiha kartaun identidade profisional saude sira.

Aleinde ne’e, ekipa GIAS mós deteta katak maske iha lista klinika ne’e foin hatama aimoruk item 140 iha fulan Janeiru 2024, maibé aimoruk hirak ne’e laiha iha sira-nia armajen.

“Lista importasaun aimoruk ne’e, sira hatama aimoruk mai Timor-Leste iha fulan Janeiru tinan ida ne’e nia laran, aimoruk hamutuk 140 item, maibé iha armajen stock laiha, iha de’it mak sampel sira ne’ebé mak sira faan,” informa fonte ida durante halo inspesaun.

Ho identifikasaun ne’e, ekipa GIAS deside hodi taka provizoriu atividade husi Farmasia K24.

Ekipa husu mós ba Jerente no Tekniku Professional Farmasia K24 atu halibur dokumentus lisensa hodi ba aprezenta iha Ministeriu Saude atu halo verifikasaun molok reativa hikas sira-nia atividade.

Entretantu, Jornalista INDEPENDENTE koko atu halo intervista ho Jerente Farmasia K24, maibé Jerente ne’e la disponivel hodi fó informasaun.