Aimoruk iha INFPM 23% Stock Out, iha HNGV 13%, INFPM sei halo kompra emerjensia Featured

By Adelaide dos Santos Fevereiru 29, 2024 205
Aimoruk iha Armajen INFPM. Foto:Dok/INDEPENDENTE. Aimoruk iha Armajen INFPM. Foto:Dok/INDEPENDENTE.

DILI: Maske governu aloka ona orsamentu besik millaun $6 hodi sosa aimoruk no produtu mediku, maibé to’o ohin loron problema aimoruk sei kontinua akontese.

Daudauk ne’e stock out ba aimoruk kontinua mosu, laos de’it iha Hospital Nasionál Guido Valadares (HNGV), maibé mós iha Institutu Nasionál Farmasia no Produtu Mediku (INFPM).

Tuir dadus husi Ministériu Saude (MS), aimoruk stock out iha INFPM iha 23% no iha HNGV aimoruk 13% mak stock out.

Portavos Ekipa Integradu Ministériu Saude no ne’ebé asumi mós kargu nu’udar Diretór Servisu Apoiu Diagnostiku Terapiotiku HNGV, Vidal Lopes informa, daudauk ne’e problema stock out ba aimoruk, konsumaveis no reajente kontinua akontese.

“Kona-ba stock out aimoruk iha INFPM 23% no iha HNGV 13% mak stock laiha,” informa nia iha edifisiu MS, Kaikoli, Dili, Segunda (27/02).

Aleinde aimoruk, nia informa, konsumaveis, liu-liu ba hepatitis iha Laboratoriu Nasionál, HNGV, 14% mak stock out.

Vidal hatutan, ba reajente, liu-liu ba Tiroid nian, iha HNGV stock laiha.

Atu rezolve problema ne’e, Portavos ne’e hatutan, halo ona pedidu kompra emerjensia ba INFPM atu ba sosa.

“Pedidu kompra emerjensia submete ona ba INFPM hodi halo kompra,” dehan nia.

Entretantu, iha 18 Outubru 2023, Ministra Saude, Elia dos Reis Amaral, asina kontratu ho Diretór kompaña Sali-Magu Unipesoal, Lda. hodi sosa no hatama aimoruk ba INFPM.

Ministra Elia fó fiar ba kompaña Sali-Magu Unipesoal, Lda. atu sosa aimoruk no produtu mediku, hodi responde ba krize aimoruk ne’ebé Timor-Leste hasoru.

Bazeia ba kontratu ne’ebé iha, ho total orsamentu millaun $5,999,990.07, kompaña Sali-Magu tenke fornese aimoruk no produtu mediku 17, durante loron 40 nia laran, sura husi loron asina kontratu, 18 Outubru 2023.

Aimoruk no produtu mediku ne’ebé kompaña Sali-Magu tenke sosa mak hanesan: 1) Produtu Aimoruk VEN 2023 ho orsamentu $1,726,842.77; 2) Produtu Medicine Ungouted items 2022, $595,060.22; 3) Lista Aimoruk Espesialista 2023, $216,062.24; 4) Produtu Medikamentus Espesialista Cardiologia, $214,290.00; 5) Produtu Konsumaveis 2023, $1,118,018.39; 6) Produtu Laboratorio ba Bactec Disk (BD) produts Microbiology, $324,951.00; 7) General Laboratory Consumables-Used by all departments, $319,731.85; 8) Produtu Fuji Film DRI-CHEM NX600 Consumables, $230,987.45; 9) Lista Serology and for LNS, HNGV, HR Baukau, Maubessi, HR Maliana, HR Suai, $333.525.50; 10) Produtu Reagent Quantification For Hematology (Mindray Reagents), $179,165.00; 11) Produtu Vitros, $225,950.09; 12) Produtu Cell Dyn Emerald 22, $196,914.50; 13) Lab. Taxicology, $60,991.76; 14) Produtu Reagent Quantification For Histocytology HNGV, $54,429.50; 15) Produtu Coagulation Machine, $61,188.40; 16) Produtu Staining Reagents, $9,054.00; no, 17) Eyes & Dental Produts, $132,827.40.

Distribuisaun kontinua lao

Institutu Nasional Farmasia no Produtu Mediku (INFPM) distribui ona aimoruk ba ospital no fasilidade saude sira, maibé seidauk 100% tanba aimoruk balun tenke verifika didi’ak.

“Klaru distribuisaun la’o ona maibé seidauk 100% tanba buat balun ita tenke verifika halo didi’ak, tanba aimoruk ne’e tenke kuidadu,” dehan nia.

Distribuisaun ne’e, nia dehan, bazeia ba pedidu husi ospital no fasilidade saude sira.

“Ida ne’ebé emerjensia liu pedidu to’o tenke oferese kedas, ida ne’ebé mak pressiza tempu ne’e hein lai hodi fó tempu atu verifika didi’ak lai tanba kestaun rekursu umanu, balun servisu to’o kalan, hodi responde ba pedidu husi fasilidade saude sira,” katak nia.

Molok ne’e, Diretór Servisu Saude Munisipiu Ermera, Antonio de Deus Fatima informa, daudauk ne’e fasilidade saude sira iha Ermera hasoru hela problema aimoruk laiha.

“Agora daudaun ita-nia stock aimoruk iha item tolu hanesan paracetamol, Amoxilin, ho Amoxilin Syrup ba labarik sira mak stock menus,” dehan nia via telefone, Kuarta (14/02).

Nia parte, Antonio hatutan, hato’o pedidu ba INFPM ba aimoruk item 122, maibé husi parte INFPM aprova de’it mak item 41.

Rate this item
(0 votes)

Independente Digital TV