Foin lalais ne’e, iha 8 Agostu, liu husi intervista ho RTTL iha programa Segimentus Sete Menutus, Adjunto Diretór PSIK deklara katak, nia halo atuasaun bazeia ba orientasaun husi Ministru Justisa Manuel Carceres, tanba manifestante sira na’in 20 resin derrepente mosu iha edifisiu Ministériu Justisa no halo perturbasaun uitoan.

“Ha’u respeitu tebes ha’u-nia alin sira bainhira sira mai, manifestasaun ne’e halo iha fatin ida, derrepente sira mosu ona iha ministériu da justisa, edifisiu publika. Konforme ita-nia lei manifestasaun ninian, ita hatene katak tenke priense rekezitus, intermus de regras iha 100 metrus, nu fim mosu iha ne’ebá, i halo hanesan perturbasaun uitoan, sira ne’ebé serbisu iha ne’ebá ladun hakmatek.”

“Entaun, ha’u simu orientasaun, informasaun duni husi sua exelensia ministru. Ida ne’e ami-nia lei organika hatete ‘superiormente PSIK ne’e submete ba ministru da justisa’, (MJ Carceres) orienta ‘ita ba konfirma took alin sira iha ne’ebá’,” esplika Adino hanesan jornal INDEPENDENTE sita husi RTTL, Tersa (11/08).

Adino mós rezeita total informasaun katak nia ho nia ekipa halo ameasa hasoru reprezentante manifestante na’in tolu.

Adjuntu Diretór PSIK ne’e dehan, nia iha evidensia filmajen, hahú husi reprezentante manifestante sira tama to’o reuniaun no sira fila fali.

“Filmajen kompletu hotu kedas,” dehan Adino.

Relasiona ho deklarasaun ida ne’e, Portavoz FMTL Novelino dos Santos hatete, deklarasaun ne’ebé Adjuntu Diretór PSIK hato’o nakonu ho lia bosok bosok no la bazeia faktus.

Tanba, tuir nia, iha altura ne’ebá, Adjuntu Diretór PSIK ho nia membru sira hatudu atetude ne’ebé ho tendensia ba violasaun direitus umanus.

“Deklarasaun señor Adjuntu PSIK Adino N. Cabral katak ami mosu derrepente iha MJ hodi halo perturbasaun ne’e la loos,” dehan nia liu husi konferensia imprensa iha edifisiu Faspol, UNTL, Tersa (11/08).

Portavoz FMTL ne’e husu atu loke no fó sai gravasaun CCTV Ministériu Justisa no gravasaun audio no video prosesu interogasaun ne’ebé PSIK halo hodi bele prova lia-fuan ne’ebé Adjuntu Diretór PSIK fó sai ona.

“Dalan uniku atu justifika Ajuntu PSIK Adino Cabral nia bosok hodi bobar lia ba publiku mak loke gravasaun CCTV iha Ministeiru Justisa, inklui gravasaun audio no video husi prosesu interogatoriu ne’ebé PSIK halo,” dehan nia.

Tuir Novelino, númeru reprezentante manifestante ne’ebé ba edifisiu Ministériu Justisa hamutuk na’in 13, inklui jornalista ida, la’os na’in 20 resin hanesan Adino temi.

Intensaun husi FMTL ba iha edifisiu MJ, Novelino dehan, atu hasoru malu ho Xefe Gabinete MJ relasiona ho akta konkordansia ne’ebé hatama ona iha 3 Agostu, hodi husu audensia ho Ministru Carceres.

“Tanba ne’e mak iha dia 4 Agostu 2020 tuku 15.30, ami ba hamutuk ho Polisia Nasionál Timor-Leste ne’ebe halo akompañamentu ba reprezentante husi FMTL atu ba konfirma fila fali karta konkordansia ne’e,” dehan nia hodi responde ba deklarasaun Adino katak sira mosu derrepente de’it iha edifisiu MJ.

Bainhira to’o iha ne’ebá, Novelino hatete, sira hasoru fali Adjuntu Diretór PSIK ho nia membru sira ne’ebé halo atuasaun nakonu ho intimidasaun.

“Sira interoga fali ami hanesan kriminozu ida,” dehan nia.

Tuir FMTL, atuasaun Adjuntu Diretór PSIK ho nia ekipa nu’udar asaun violasaun direitus umanus ne’ebé pratika husi Polisia Indonezia hasoru joven rezistensia sira iha tempu okupasaun Indonezia.

Tan ne’e, FMTL ezije ba Primeiru Ministru Taur Matan Ruak atu foti medidas hodi demite imediatu Adino N. Cabral husi nia kargu nu’udar Adjuntu PSIK tanba nia aktu la respeita konstituisaun no lei sira.

FMTL mós husu ba Ministeriu Públiku no Komisaun Funsaun Publiku atu halo investigasaun ba funsinariu sira, iklui membru PSIK ne’ebé pratika ateteude la umanu hasoru manifestante sira-nia reprezentante iha edifisiu MJ.

Kona-ba deklarasaun Adino katak nia hetan orientasaun husi Ministru Carceres, tuir FMTL, ida ne’e hatudu katak Ministru Carceres koko politiza funsaun PSIK hodi asegura ninia politika fasista ne’ebé nia prepara nu’udar traisaun ba demokrasia.