Diretór jerál DJJPE, Januario da Gama hateten, ekipa fiskalizasaun konjuntu ne’ebé estabelese bazeia ba rezolusaun governu no sirkulár Ministáriu Finansas (MF) nian, hanesan kontinuasaun husi despaixu ba ekipa fiskalizasaun konjuntu iha tempu uluk ninian.
Nia dehan, hahu loron 27/10 ekipa konjunta hakarak atu informa kona-ba nesesidade ekipa fiskalizasaun konjuntu, hodi halo kontrolu, ka check point ba movimentu veikulu estadu ninian, tantu kareta estadu, no motorizada estadu, iha ámbitu selebrasaun loron boot finadu nian.
Tuir nia rezolusaun governu 132/2021, kona-ba jestaun no realokasaun veikulu estadu, no reforsa mos ho dekretu lei númeru 21/2021, kona-ba subsídiu mensál, transporte ba funsionáriu públiku ninian, fó kompeténsia no fó mandatu ba ekipa fiskalizasaun konjunta, hodi kontinua regularmente halo kontrolu ba movimentu veikulu estadu, la’os de’it iha loron serbisu, maibé, iha loron fim de semana, no loron boot sira hanesan finadu nian.
“Objetivu husi kontrolu ka movimentu viatura estadu ne’ebé ekipa konjuntu sei halo, atu kontinua halo melloramentu ida, liu liu oinsá ita bele iha efisiénsia no efetividade ba utilizasaun rekursu estadu ninian, no aumezmu tempu, bele kontribui ba iha redusaun despeza estadu nian,” dehan Januari0 ba jornalista sira, liu husi konferénsia imprénsa iha kuartel Jerál Komandu PNTL, Kaikoli (27/10).
Nia dehan, ema hotu hatene katak, bainhira veikulu ka viátura estadu sira ne’e maka kontinua iha irregularidade ba utilizasaun, la kontribui ba iha nesedidade fins profisionais instituisaun nian, maka sei kontribui ba iha despeza estadu ne’ebé boot liután.
“Entaun, politika Oitavu Governu nian oinsá, mak ita bele halo efisiénsia no efetividade despezas, liu liu oinsá ita bele promove poupansa ida ne’ebé signifikante ba despeza estadu nian kona-ba utilizasaun veikulu estadu, tanba ne’e ita forma ona ekipa konjunta atu halo servisu check point ba véikulu estadu, husi nivel nasional, to’o iha nivel munisipiu, inklui mós postu administrativa sira,” tenik nia.
Iha fatin hanesan, Pontu fokál KAK, Euclides Vidal Madeira, hateten, bazeia ba dekretu-lei númeru 21/2021, loron 10 Novembru, kria subsídiu mensál ba transporte no rezolusaun governu númeru 130/2021 kona-ba jestaun no realokasaun veikulu estadu no Padraun Prosedimentu Operasionál (PPO) kona-ba realokasaun no utilizasaun veikulu estadu Pool iha ministériu, instituisaun estadu, serbisu fundu autónoma no Pool Nasionál.
Nia infirma, ekipa konjunta, alerta ka fó hanoin ba responsável lojístika no patrimóniu iha ministériu, instituisaun estadu, serbisu fundu autónoma, autoridade no administrasaun munisipál hotu katak, tenke halo kontrolu másimu ba utilizasaun viaturas estadu iha loron feriadu matebian ka finadu iha 31 Outubru 2022, no autoriza de’it ba sira ne’ebé halo aktividade ba fins profisionais ho karta autorizasaun husi superior.
“Ema ne’ebé hetan autorizadu ona ho lei no dekretu lei sira hodi uza regularmente viatura estadu, maibe husu nafatin ba responsável lojístika no patrimóniu sira atu fó hatene ba utilizadór hotu, hodi kumpri avizu ne’e, karik iha utilizadór balu ne’ebé la kumpri, halo favór informa ba ekipa fiskalizasaun konjunta atu halo intervensaun imediata,” Informa nia.
Tanba ne’e ekipa fiskalizasaun konjunta sei halo monitorizasaun ba utilizasaun kareta estadu durante loron boot finadu sei vizita ba ministériu ida idak atu halo check point no sweeping hodi hatene kareta iha Ministeriu sira.
Nia afirma, Ekipa konjunta halo ona koordenasaun ho PNTL, diresaun Tránzitu Nasionál no Munisipiu, hodi halo check point ba movimentu viatura sira estadu nian iha nivel munisipiu, postu administrativu sira, hodi identifika utilizadór viatura sira estadu nian ne’ebé la kumpri avizu ne’e, hodi bele prosede ba prosesu.
“Utilizadór viatura estadu, kareta no motorizada ne’ebé mak la kumpri avizu ne’ebé mak ami fó sai ona, sei hetan responsábilidade administrativa, dixiplinár no kriminál,” afirma nia.
Nia hatutan laos deit ekipa fiskalizasaun konjunta mesak atu halo kontrolu, maibe husu ba publiku atu ajuda halo apoiu halo kontrolu ba utilizasaun viatura estadu nian, durante loron finadu mak hetan ema ruma uza kareta estadu bele hasai fotográfia no video hodi lansa iha média sosiál hanesan Facebook KAK no númeru Watss App, 77304448, 77991550 no 77230192, hodi bele prosesa.
“Ita fo autorizasaun de’it instituisaun hanesan PNTL F-FDTL, Serbisu Saúde, Bombeirus, Serbisu Karantina, Alfándega, Ambulánsia, bele uza kareta estadu halo movimentu, tanba sira iha autorizasaun hodi hala’o serbisu professionál atu fo asisténsia ba dezastre naturais,” hakotu nia.
