Nia haktuir, enkontru ho Prezidente Repúblika ne’e atu ko’alia kona ba situasaun rai laran no oinsá atu mantein operasionál forsa nian, kontrolla forsa sira ne’ebé la disiplina, nune’e labele halo problema ho populasaun.
“Operasaun konjunta remata ona no agora hein atu hato’o de’it relatóriu. Operasaun ne'e atu kontinua ka la’e depende ba situasaun iha rai laran, bainhira situasaun ameasadu, operasaun konjunta kontinua no karik situasaun kalma ona operasaun konjunta bele hapara," informa Falur Rate Laek ba jornalista sira hafoin remata enkontru regulár ho Xefe Estadu iha Palasiu Prezidensiál Bairu-Pite, (16/09).
Nia haktuir, maske nune’e PNTL nafatin hetan apoiu husi F-FDTL hodi asegura seguransa iha rai laran, liu husi hala’o patrullamentu nune'e bele kontrolla militár sira labele la'o tun sa’e.
Entretantu, Prezidente Repúblika José Ramos Horta husu mantein operasaun forsa nian, manetin kontrolla disiplina forsa nian, atu labele halo problema sosiál ho komunidade.
Antes ne’e, Komandante PNTL Munisipiu Dili, Superintendente Xefi, Henrique da Costa hateten, operasaun konjunta F-FDTL no PNTL sei remata iha loron (15/09) tuku 23:59 kalan, maibé atu kontinua ka la’e, ida ne’e komandu rua mak sei foti desizaun.
“Operasaun konjunta ne’e atu kontinua, ida ne’e Komandu rua maka sei deside, maibé Komandu PNTL Munisipiu Dili kontinua ezekuta despaixu ne’ebé mak iha no prontu garante seguransa no estabilidade nasional,” informa Henrique ba jornalista sira iha nia knaar fatin Kaikoli, (14/05).
Komandu operasaun konjunta halo ona enkontru no avaliasaun, ne’e duni sei hato’o relatoriu ba iha komandu rua (F-FDTL-PNTL) hodi avalia katak, operasaun konjunta ne’e atu kontinua estende ka retira, ida ne’e depende ba desizaun komandu rua nian.
Antes ne’e, Xefe Operasaun Komandu PNTL Munisipiu Dili, Inspektór Xefe, Delfin da Silva hateten, durante operasaun konjuntu membru PNTL- F-FDTL sei la’o tuir area sira ne'ebe determina ona hanesan Maskarinhas, KaiKoli, Taibesi, STM Becora, Terminál Becora, Has-Laran, Bidau-Masau, Metiaut, Cristo Rei, Prai dos Coqueiros, Bebonuk, Rotunda Nicolau Lobato, Tasi Tolu, Kampung Baru, Bairu Pite no finaliza iha Palasio governu.
Nia dehan, operasaun Konjunta ne’e lidera husi PNTL Dili hetan apoiu husi Departementu Tranzitu Munisipiu Dili, forsa reserva (Task force), Unidade Espesiál Polisia (UEP) Batalaun Orden Públiku (BOP) Unidade Polisia Maritima (UPM) Membru polisia balun husi Kuartel Jerál PNTL no hetan apoiu husi Komandu F-FDTL husi unidade Polisia Militár (PM).
Nia afirma, durante operasaun konjutu ne’ebé maka parte PNTL no F-FDTL halo iha Munisipiu Dili iha oras haat nia laran hodi halo pasa revista ba iha bairru sira iha Dili laran husi Cristo Rei tama to’o tasi tolu la’o di’ak iha situasaun kontroladu no hakmatek, laiha pertubasaun no konfrontu ruma nune’e halo membru F-FDTL no polisia la halo detensaun ba ema ruma.
“Tuir diretiva operasaun konjunta ne’e F-FDTL ho PNTL sei halao operasaun durante semana iha hahu iha loron 09 to’o 15 setembru 2022, maibe iha asinatura akordu komandu rua ba oin kontinua servisu hamutuk atu garante pas no estabilidade nasional iha TL,” hakotu nia.
Tanba ne’e parte Komandu PNTL Dili ne’ebé hetan apoiu hosi Unidade UEP, UPM, UPF no F-FDTL hosi Unidade Polisia Militár rasik sei kontinua halo operasaun konjunta hodi halo patrollamentu tama sai bairru liu liu área hirak iha Dili laran ne’ebé konsidera hanesan área risku ba konflitu, nune’e atu joven sira iha bairu kontribui ba pás no estabilidade, atu ema hotu sente livre iha tempu loron no kalan.
