Enkuantu, Prezidente Ramos Horta, kongratula Embaixadór Fiedrich ba nomeasaun, no fó benvindu ba nia ho laran luak.
Iha ambitu ne’e, Prezidente no Embaixadór ko’alia kona-ba área-xave sira husi koperasaun, hanesan integrasaun rejionál, diversifikasaun ekonómika no nutrisaun.
Sira mós aborda panorama polítiku iha Timor-Leste no tinan eleitorál, ne’ebé besik atu mai.
“Embaixadór Fiedrich hato’o ninia kompromisu hodi dezenvolve saida mak ninia antesesór alkansa tiha ona, no hodi haklean no habelar liu tan relasaun sira iha entre Uniaun Europeia no TimorLeste, ne’ebé di’ak tebes,”haktuir komunikadu ne’ebé Online INDEPENDENTE asesu, domingo (18/09).
Enkuantu, Timor-Leste no UE fahe valór sira hanesan, no sira unidu iha defeza no promosaun husi liberdade fundamentál sira, direitus umanus, demokrasia no husi multilateralismu.
Nia promete katak, Uniaun Europeia sei nafatin sai parseiru ida ba Timor-Leste, hodi fó apoiu ba konstrusaun estadu nian.
Entretantu, Marc Fiedrich simu nomeasaun nu’udar Embaixadór UE iha Timor-Leste iha fulan Juñu tinan 2022, ne’ebé substitui Andrew Jacobs. Nia to’o iha Timor-Leste iha loron 5 fulan Setembru. Ninia misaun iha durasaun ba tinan tolu.
