Asia Justice and Rights (AJAR) kestiona partisipasaun TL iha Expo Dubai no konsidera sei la fó benefisiu ba TL.

“Primeiru atu husu agora ita ko’alia kona-ba Expo Dubai nian, agora ita husu rezultadu husi Expo iha Shanghai-Xina no mós Milan-Italia tinan hirak liu ba ne’e iha ne’ebé?,” dehan Diretór Ezekutivu AJAR José Luis Oliveira iha nia knar fatin, Farol, horisehik.

Nia dehan, bainhira partisipasaun TL iha Expo Shanghai no Milan hatudu rezultadu signifikante ba setor turizmu no ekonomia nasaun nia, TL merese duni atu ba partisipa iha Expo Dubai.

“Uluk iha Expo seluk ne’ebé halo iha Xina ne’e mós hanesan, osan barak, agora ita hakarak husu rezultadu iha ne’ebé, rezultadu signifikante iha duni ita-nia turizmu no mós ita-nia ekonómia ka la’e?, se iha entaun ita merese ba Expo Dubai maibé realidade laiha,” dehan Diretór Ezekutivu ne’e.

Tuir nia, TL nia partisipasaun iha Expo Dubai hodi halo promosaun boot maibé realidade infra-estrutura, liu-liu ba objetu turizmu sira sabaraut hela.

“Ba promove boboot see mak atu mai?, ema la mai, ita gasta osan saugate, gasta osan atu satisfas aan de’it”.

“Agora promove dehan Timor ne’e kapaas hanesan ne’e, eventu kultura iha fatin turizmu sira ne’e iha ne’ebé?, objetu turizmu sira ne’e sabaraut hela,” dehan nia.

Diretór ne’e informa, nia foin fila husi Pujada Tutuala ne’ebé aat loos ne’ebé loloos governu aloka orsamentu ba ne’ebá hodi hadia.

“Bainhira halo promosaun ne’e tenke refleta realidade iha rai laran ne’e di’ak, ha’u hanesan produs buat di’ak tiha mak ha’u ba promove, see mak hakarak mai sosa ha’u-nia sasan, lobby ne’e hanesan ne’e,” dehan nia.

Tan ne’e, nia konsidera programa expo Dubai ne’e nu’udar programa husi governu ida ne’ebé ulun laiha.

“Ninia lojika ne’e, sasan iha uma laran seidauk hadia, nia ba promove tiha uluk iha li’ur, ne’e nia ba inventa sasan. Promove tiha, agora ema mai karik ema atu ba sosa sasan iha ne’ebé? see ema interese de’it eventu kultural ruma, ema interese atu haan kuliner ruma husi Timor, ida ne’ebé tuir estandar ijene nian, atu ba hetan iha ne’ebé?, sira inventa de’it sasan atu sira ba pasiar de’it, ne’e dezde uluk Miss Timor ne’e rezultadu iha ne’ebé?,” dehan nia.