Xefe Departamentu Programa KNDL ne'ebé hetan autorizasaun husi Komisária, José  C. da Piedade hateten, nu’udar fiskalizadór ba direitu labarik, komisaun sira suzere ba Prezidente Autoridade Munisipiu Dili atu kria kondisaun ba inan aman sira, nune’e bele evita labarik sira labele kontinua faan sasan iha dalan públiku

"Ita apoiu programa ne'ebé maka iha, maibé ita mós suzere ba Prezidente Munisípiu Dili atu kria kondisaun ba inan aman sira, nune’e bele buka vida liu husi fa’an sasan, la’os iha fatin públiku ezemplu iha trotoar leten tamba, ida ne'e mós afeta ba labarik sira," dehan José  C. da Piedade ba Jornalista INDEPENDENTE iha nia knaar fatin, Kaikoli (13/1).

Nia haktuir, felizmente komisaun mós aseita atu PAM bandu labarik sira faan sasan hodi hamenus  númeru infantil iha servisu ne'e rasik.

" Lei direitus umanus mós ko'alia katak, labarik labele kastigu no halo servisu,” tenik nia.

Nia informa, tanba kestaun ekonomia maka obriga labarik sira atu kontinua halo servisu, maibé lolos labarik sira ne'e la merese atu halo servisu.

Tamba ne’e, governu kria kondisaun lubuk ida ho gratuita, liu husi bolsa da mãe atu inan-aman sira bele hakbesik ba MSSI hodi bele rejista ba sira ne'ebé laiha kbiit ba labarik sira atu asesu ba edukasaun.

" Bainhira tau labarik ba iha risku halo servisu la tuir sira nia idade, ida ne’e sei afeta ba sira nia mentalidade fíziku nomós bele lakon oportunidade ba edukasaun,entaun inan-aman sira tenke hakbesik mai MSSI para bele rejistu" tenik nia.

Antes ne'e, PAM Dili, Guilermina Filomena Saldanha promote, iha tinan 2022 labarik sira labele fa’an sasan ona iha dalan públiku, tamba atividade ne'e responsabilidade inan-aman sira nian.

" Hakarak ka lakoi iha tinan 2022,ha'u lakoi hare labarik sira ne'ebé ho idade minoridade faan sasan iha dalan ninin, tamba labarik sira ne'e nia fatin iha eskola no uma ho idade 17 ba kraik inan-aman mak tenke hola responsabilidade, " dehan nia.