“Artigu 86, alíña c iha konstituisaun, fó kbiit tomak ba Prezidente Repúblika atu marka loron ba eleisaun prezidensiál no lejislativa,”dehan komunikadu imprensa neebé Online INDEPENDENTE asesu, sabado nee.
Ho nunee, bazeia ba artigu 12, númeru 1, husi Lei númeru 7/2006, 26 dezembru (Lei Eleitorál ba Prezidente Repúblika), ho alterasaun hirak ne’ebé halo ona ba Lei ne’e, molok Prezidente Repúblika dekreta data eleisaun prezidensiál, tenke rona uluk Governu no mós partidu polítiku sira ho asentu iha Parlamentu Nasionál,
“Karik rezultadu eleisaun ne’e hatudu katak la iha kandidatu ida mak konsege hetan 50%+1 (metade ho votu ida tan) husi númeru total votus válidus, iha eleisaun ne’e, ita sei tuir fali eleisaun daruak,”haktuir komunikadu.
Tuir artigu 12, númeru 2, husi Lei Eleitorál ba Prezidente Repúblika, eleisaun daruak sei halo iha loron tolu-nulu (30), sura husi loron eleisaun dahuluk. ba eleisaun daruak ne’e, sei la presiza ona iha tan dekretu prezidensiál ba markasaun data eleisaun daruak nian.
Entretantu, ba eleisaun ida ne’e, Prezidente Repúblika rona ona Governu, partidu polítiku hotu ho asentu iha Parlamentu Nasionál, Komisaun Nasionál Eleisaun (CNE-sigla portugés) no Sekretariadu Tékniku Administrasaun Eleitorál (STAE).
