Xefe Governu ne’e hahú ninia deklarasaun kona-ba eviksaun ne’ebé ekipa konjunta halo ho pergunta ida “Hakarak Dili foer ka Dili moos uitoan?”.

“Imi rona beibeik ona ami bolu Sekretáriu Estadu (SEATOU) ne’e Sekretáriu Estadu sobu. Atu dehan katak buat ne’e aviza antes tiha, hasai tiha nia naran hodi fó osan uitoan. Ema hotu mai okupa Dili, ita dehan hakarak liberta povu, Dili sai nusa loos. Hakarak ida ne’ebé, hakarak Dili foer ka Dili moos uitona?,” dehan PM Xanana ba jornalista sira hafoin enkontru semanál ho Prezidente Repúblika, José Ramos Horta, iha Palasiu Prezidensiál Bairo-Pite, Kinta (16/06).

PM Xanana hatete, sidadaun sira barak husi munisipiu seluk mai iha Dili tanba buka servisu. Tan ne’e governu dasia konsentra ba implementasaun desentralizasaun nune’e sidadaun sira la mai hotu Dili hodi buka moris, maibé bele hela iha idaidak nia munisipiu.

“Desentralizasaun la’os hili de’it assembleia munisipál maibé desentralizasaun ne’e governu lokál mak atu forma tékniku iha finansa, administrasaun, planeamentu no enjeñaria nian.  Tanba ne’e Governu ida ne’e tenta atu halo iha munisípiu ida Governu lokál iha ona ne’ebé haree ba saúde, edukasaun, turizmu no buat hotu-hotu.”

“Ema sira iha munisípiu la mai ona Dili. Tanba saida mak mai barak iha Dili, loos duni serbisu laiha, ne’e la’ós de’it Timor maibé iha fatin hotu-hotu, ne’e duni Timor-oan mak tenke muda mentalidade hodi dehan katak, servisu iha ne’ebé no servisu oin nusa, ho ida ne’e mak desentralizasaun ne’e importante,” Xefe Governu ne’e hatete.

Iha 29 Abril liu ba, Sekretariu Estadu Asuntu Toponomia no Organizasaun Urbana (SEATOU), Germano Santa Brites Dias, hasoru-malu ho Primeiru Ministru, Kay Rala Xanana Gusmão, iha palasiu governu.

Hafoin hasoru-malu ho PM Xanana, SEATOU hatete, nia hasoru-malu ho Xefe Governu tanba iha asuntu servisu balun ne’ebé nia presiza koordena no koalia, no informa mós kona-ba servisu ne’ebé sira halo ona iha terenu.

“Saida mak ami halo tiha ona ne’e mak fó hatene ba Primeiru Ministru, servisu idaidak nian, tuir knar no kompetensia,” dehan Germano hafoin enkontru.

Nia dehan, despezu administrativu ne’ebé lao durante ne’e tuir Lei ne’ebé iha ona. Tan ne’e, PM Xanana husu ba ekipa atu hala’o servisu bazeia de’it ba lei no kompetensia.

Kona-ba indenimizasaun, nia dehan, SEATOU nia servisu mak atu haree no hasai populasaun ne’ebé okupa espasu públiku. Enkuantu ba indinimizasaun ne’e ekipa husi Ministériu Administrasaun Estatal no Autoridade Munisipiu Dili, mak halo servisu ba ida ne’e.

“Tenke foti dadus hodi hatene populasaun hira mak kona despezu administrativu. Kona-ba indenimizasaun ka lae, ne’e ekipa seluk nia servisu. SEATOU nia servisu mak hamoos de’it,” nia deklara.

Nia afirma, atividade despezu administrativu nafatin lao iha fatin-fatin to’o sidade Dili organizadu no moos.