Sekretaria Meza Parlamentu Nasionál, Virginia Ana Belo informa, iha reuniaun lider bankada sira iha 16 Maiu, horseik, deside hodi bolu Ministra Saude, Elia dos Reis Amaral, atu mai diskuti kona-ba problema saude.
“Ohin (horseik) iha reuniun lider bankada deside ona iha loron Kuarta-feira (22/05) sei iha plenaria estra-ordinariu ho Ministra Saude (Elia) kona-ba asuntu saude iha rejional no nasional,” informa Virginia, iha Parlamentu Nasional, Kinta (16/05).
Iha plenaria estra-ordinaria ne’e, nia dehan, sei halo diskusaun kona-ba problema saude, liu-liu kona-ba problema aimoruk ne’ebe mak kontinua stock out iha ospital no sentru saude sira.
“Ita sei elabora hela oinsa Prezidente (PN) sei haree hela liga mós rejimentu atu fokus loos ba ida ne’ebé, komu saude ninia problema barak tebtebes, talves ita bele aranje to’o iha ninia asuntu sira seluk, depois mak ita ajusta ida ne’e,” nia dehan.
Molok ne’e, Vise Ministru Asuntu Parlamentar, Aderito Hugo hatete, duke deputadu sira halo de’it deklarasaun politika, di’ak liu Parlamentu Nasionál bolu Ministra Saude, Elia dos Reis Amaral, ho nia vise na’in rua, hodi halo esplikasaun kona-ba problema iha seitór saude,
Vise Ministru ne’e dehan, governu apresia tebes ho kritika sira husi bankada Fretilin no Khunto kona-ba problema aimoruk.
Apresia mós bankada oposizaun sira ne'ebé vizita HNGV hodi observa espasu atendimentu ba povu sira. Tan ne'e, husu atu bankada oposizaun sira kontinua ativu ba fiskalizasaun sira hodi haree dezempeñu servisu Governu nian.
"Kuandu Governu rejista hela pontu sira ne'ebe deputadu sira hato'o, ami kontinua hadia, ami mós husu nafatin papel Parlamentu nian hodi bolu kualker tempu membru Governu sira tuir fatin sira ne'ebé tuir deputadu sira haree sai grave tebes ona, deputadu sira nonook de’it halo deklarasaun poltika, nusa la bolu?", dehan Hugo iha plenaria Parlamentu Nasional, Tersa (14/05).
Problema kona-ba aimoruk iha sentru saude no ospital sira, PN persiza bolu dirijente Ministériu Saude hodi bele esplika.
"Iha (Ministériu) Saude iha membru Governu na’in tolu, Ministra ho Vise na’in rua, bele bolu kualker tempu, ha'u pronunsia ona iha Parlamentu ne'e orientasaun Primeiru Ministru, Kay Rala Xanana Gusmnão, nian ba membru Governu sira, bainhira Parlamentu Nasional bolu, membru Governu sira tenke prontu kualker tempu ba Parlamentu par bele esplika detallu, la'os deputadu sira mak fó resposta ba malu," dehan nia.
