Kits patrulla ida-idak inklui suprimentu Primeiru Sokoru no ekipamentu seguransa fornese husi Organizasaun Internasionál ba Migrasaun hodi tulun patrullamentu hirak-ne’ebé hala’o iha área remotas sira no sustenta polisiamentu komunitáriu ho efikáz iha munisípiu refere. Kits sira ne’e mós inklui guia-de-kampu ne’ebé fornese husi Organizasaun Internasionál ba Migrasaun hodi ajuda ofisiál sira atu deteta potensia kazu tráfiku umanu iha zona transfronteira sira.

“Estadus Unidus Amérika fó bemvindu ba oportunidade ida-idak hodi kontinua hametin PNTL nia prátika implementasaun lei ho efikáz,” hateten Enkarregadu Daley, iha komunikadu ne’ebé Online INDEPENDENTE sita, segunda (24/04).

“Ami iha nafatin kompromisu halo parseria hodi proteje dignidade no direitus umanus komunidade lokál sira-nian, inklui ema husi jéneru, orientasaun, no orijen hotu-hotu.”

Entretantu,iha serimónia entrega ne’e, Enkarregadu Daley hato’o ninia agradesimentu ba Superintendente Nicolau Francelino da Costa no ofisiál PNTL sira ba kompromisu implementasaun lei ho efikáz, liuliu iha polisiamentu komunitáriu no hametin lei iha fronteira.

Enkuantu, Estadus Unidus Amérika valoriza esforsu PNTL nian hodi asegura katak vítima no ema vulnerável sira iha Timor-Leste simu asisténsia ne’ebé sira presiza no prontu halo parseria hodi alkansa futuru ne’ebé seguru liu ba povu Timor-Leste iha tinan hirak oin mai.

Tanba ne’e, Estadus Unidus Amérika iha kompromisu hodi apoia Timor-Leste atu hametin estadu direitu. Hahú husi Timor-Leste nia restaurasaun independénsia, Estadus Unidus Amérika patrosina ona ofisiais Timoroan na’in 400-resin no autoridade judisiáriu sira hodi ba tuir formasaun espesializada iha área investigasaun, interdisaun iha fronteira, no kontra-narkotika iha sentru formasaun International Law Enforcement Academy iha Bangkok. Estadus Unidus Amérika mós fornese ona treinu no ekipamentu táktiku ba PNTL hodi hadi’ak liután kapasidade operasionál iha ambiente sira ne’ebé ho risku aas.