Diretora Servisu Saúde Munispiu Dili, Agostina Segurada hatete, husi total eskola 146 iha kapital Dili, parte saúde foin mak halo vasinasaun iha eskola 55.

Husi eskola 55 ne’e, nia dehan, eskola balun ekipa saúde finaliza ona prosesu vasinasaun, maibé balun sei kontinua tanba eskola balun estudante nia númeru to’o rihun ba leten.

“ Husi sira-nia partisipasaun ita haree maximu tebtebes, sira rasik antusiasmu inklui inan-aman nia apoiu di’ak hodi partisipa akompaña no profesor sira inklui diretor eskola sira mós apoia tebes,” informa Agostina iha nia knar-fatin, edifisiu Servisu Saúde Munisipiu Dili, Formoza, Kuarta (10/11).

Nia dehan, ba labarik sira ho idade tinan 12 to’o 17 ne’ebé la eskola, nia dehan, iha semana ne’e ekipa prepara atu fó vasinasaun ba sira.

“Ita sei utiliza sentru saúde lima iha Dili laran, inklui HNGV hodi sai postu vasinasaun,” nia dehan.

Parte saúde, nia hatutan, halo ona komunikasaun ho prezidente autoridade munispiu, administrador postu sira, inklui autoridade lokal atu bele fahe informasaun ba inan-aman hotu iha baze hodi haruka sira-nia oan simu vasina.

“Depois ita haree took, implementasaun husi loron 15 to’o loron 19 mak lakonsege iha rezultadu mak ekipa saúde buka dalan atu tuun ba suku to’o aldeia idaidak,” katak nia.

Molok ne’e, iha lansamentu ba vasina Pfizer, Ministra Saúde, Odete Maria Freitas, haksolok tanba TL hahú ona fó vasina ba joven sira.

Tan ne’e, nia apela ba estudante, inan-aman no profesor sira hotu atu apoiu kampaña vasinasaun.

Tanba, nia dehan, atu fila ba normalidade importante tebes atu sidadaun hotu iha Timor Leste oferese sira-nia isin hodi simu vasinasaun.

“Ita hakarak atu fila-fali ba tempu uluk entaun importante tebes tenke simu vasina atu bele livre husi Covid-19 atu bele hala’o atividade ho saúdavel,” dehan nia iha lansamentu Vasina Pfizer doze dahuluk, iha Eskola 30 Agostu, Komoro, Kuarta (27/10).