Tuir planu, estrutura governu foun atu aumenta vise-primeiru ministru na’in rua. Maibé, bele sai obstaklu iha futuru tanba agora daudaun governu la’o de’it ho Dotasaun Orsamentu Temporaria (DOT).

Reitór Universidade da Paz (UNPAZ), Adolmando Amaral hateten, VIII Governu halo ona alterasaun ba Lei Orgánika Governu hodi aumenta vise-primeiru ministru na’in rua maibé Orsamentu Jerál Estadu (OJE) laiha atu bele aloka ba fatin foun ne’e.

“Hamosu kadeira barabarak vise-primeiru ministru na’in rua osan ne’e osan mai husi ne'ebé, tanba Orsamentu Jerál Estadu la aprova. Serake osan ne’e kabe hotu osan tokon US$150 ne’ebé prevé ba Covid-19”, dehan nia, via telefone, horisehik.

Nia hatutan, Estadu Emerjénsia hodi konsentra ba prevensaun Covid-19, tanba ne’e desizaun polítika ne'ebé foti laiha problema, maibé intermus legalidade haree husi perspetiva konstitusionalidade laiha dalan atu forma estrutura foun.

Entretantu, nia dehan, governu uza osan duadesimu bele garante ba saláriu governante nian, maibé atu haree planu sira realiza susar uitoan tanba osan laiha.

“Ha’u hanoin ida ne’e jere ba saláriu membru governu foun ne’e bele, maibé labele halo buat ida atu ezekuta sira nia polítika”, tenik nia.

Adolmando dehan, haree husi perspetiva ekonomia nian maka sei hasoru estrutura barak maka osan ne’e sei halai hotu ba sira tanba sira-nia nesesidade mós makaas kompara ho dezenvolvimentu iha rai-laran.