Tanba ne’e, arguidu husi sidadaun Indonézia no sidadaun timoroan ne’ebé deskonfia hatama droga ba Indonézia bele sai materia diskusaun nível polítika hodi buka mekanizmu tratamentu ba sidadaun nasaun rua ne’e nian.

“Kona-ba prosesu atu halo barter entre arguidu sira ne’e hanesan materia, tanba kualker kooperasaun Estadu ho Estadu ne’e tenke underline ho prinsipiu ida reseprosidade, bainhira Timor haruka arguidu ida ba sira, saida mak sira fó ba Timor, tanba benefisiu ba parte rua ne’e importante”, dehan Prokuradór Jerál Repúblika (PJR), Jose da Costa Ximenes, iha Palasiu Prezidensiál, Bairru-Pité, horisehik.

Nia esplika, materia kona-ba kooperasaun bilaterál internasionál tenke haree husi kontestu Estadu, la’ós polisia ka prokuradór.

Atu halo pedidu ruma ne’e la’os ba polisia ho polisia maibé governu ho governu. Tanba ne’e, sidadaun na’in rua iha ne’eba ne’e labele transfere mai tanba governu sentrál iha Jakarta mak heree prosesu ne’e.

Kona-ba sidadaun kazu kazal timoroan nian, Ministeriu Públiku haruka ona Prokurador ida ho Autoridade Aolisia ida ba hasoru autoridade polisial Indonézia nian katak, autoridade Indonézia hahú halo ona orden inisiasaun inkeritu para komprova faktu sira, tanba autoridade Polisial Timor-Leste mós kaer hela sidadaun Filipina ida ho inisiál JG.

“Ema sira ne’ebé halo ne’e iha Timor ita kaer ona arguidu ho inisial JG, entaun ami haree took lai. Materia balun ne’e ha’u labele fó sai lai tanba sei iha diskusaun nia laran, ami tenta took lai ho autoridade sentral saida mak ita bele halo”, dehan nia.

Materia estradisaun la’ós nivel Ministeriu Pubiku husi nasaun ida ba nasaun seluk nian, maibé Estadu ho Estadu mak bele ko’alia. Tanba ne’e, sai hanesan dezafiu, maibe governu tenke tau atensaun ona hodi buka dalan liu husi servisu Governu ho Governu (G to G).