Ministru Koordenadór Asuntu Ekonomiku (MKAE) Interinu, Fidelis Manuel Leite Magalhaes hatete, governu sei ajuda porsentu 60 ba kada empreza hodi bele selu sira-nia funsionariu.

"Governu aprova tiha apoiu ba empreza no traballador sira, ne'ebé iha tempu badak ita sei hahú implementasaun, ita husu atu oinsa apoiu 60 pursentu mai husi estadu no 40 pursentu empreza nain mak selu ba funsionariu sira," dehan Fidelis iha edifisiu Ministeriu Finansas Ai-tarak Laran, Kuarta (22/04).

Apoiu ne'e, tuir Fidelis, ho objetivu atu empreza sira labele hasai sira-nia funsionariu durante periodu estadu emerjensia.

"Ita ko'alia kona-ba rekoperasaun ekonomia iha ema balun hanoin rekopera ekonomia so estadu emerjensia liu mak halo rekoperasaun, la'os hanesan ne'e. Iha ekonomia intervensaun ne'ebé ita presiza halo iha prinsipiu importante ida mak tempu, entaun medidas balun ita presiza halo agora, maibé ninia benefisiu ne'e sei mosu iha futuru," dehan nia.

Fidelis dehan, governu presiza halo medidas intervensaun balun agora, tanba bainhira la halo empreza sira laiha kapasidade finanseiru atu bele selu sira-nia trabaladór.

"Ho situasaun hanesan ne'e ita la halo intervensaun, antes ita to'o iha rekoperasaun ekonomia empreza barak mak laiha kapasidade finanseiru, traballador barak mak sei lakon nia servisu durante fulan hirak nia laran i bele mos lakon servisu tinan ida nia laran."